पोर्चुगल — पोर्चुगिज इन्स्टिच्युट फर द सी एण्ड द एटमोस्फियर (IPMA) ले आगामी केही दिनहरूमा पोर्चुगलको मुख्य भूमिमा मौसम निकै खराब रहने चेतावनी जारी गरेको छ । मौसमविद्हरूका अनुसार यो अवधिमा देशका विभिन्न भागमा भारी वर्षा हुनुका साथै तीव्र गतिको हावा चल्ने र समुद्री किनारमा ठूला छालहरू आउने सम्भावना रहेको छ ।
विशेषगरी पोर्चुगलको उत्तरी र मध्य क्षेत्रहरू यस मौसमी परिवर्तनबाट बढी प्रभावित हुने देखिएको छ । ती क्षेत्रहरूमा केही समयसम्म निरन्तर र भारी वर्षा हुने पूर्वानुमान गरिएको छ, जसले गर्दा जनजीवनमा असर पर्न सक्नेछ । वर्षासँगै यी क्षेत्रका उच्च पहाडी भू-भागहरूमा हावाको गति पनि निकै तीव्र रहनेछ ।
अनुमान गरिए अनुसार ९० किलोमिटर प्रतिघण्टासम्मको वेगमा हावा चल्ने भएकाले सतर्कता अपनाउन आग्रह गरिएको छ ।
यसैगरी, समुद्री तटमा पनि मौसमको कडा प्रभाव देखिनेछ । पश्चिम तटीय क्षेत्रमा समुद्र निकै अशान्त रहने र उत्तरपश्चिमी दिशाबाट आउने छालहरू ६ मिटरदेखि अधिकतम ११ मिटर उचाइसम्म पुग्न सक्ने बताइएको छ । खराब मौसम र समुद्री छालका कारण तटीय क्षेत्रमा बसोबास गर्नेहरू र सामुद्रिक यात्रा गर्नेहरूलाई विशेष सावधानी अपनाउन र सुरक्षा निकायले जारी गरेका निर्देशनहरू पालना गर्न सुझाव दिइएको छ ।
