म्यानचेस्टर — इंग्लिस प्रिमियर लिगको दिग्गज क्लब म्यानचेस्टर युनाइटेडले आफ्ना मुख्य प्रशिक्षक रुबेन अमोरिमलाई पदबाट बर्खास्त गरेको छ । यो निर्णयसँगै ओल्ड ट्राफोर्डमा अमोरिमको १ वर्ष २ महिना लामो प्रशिक्षण यात्रामा पूर्णविराम लागेको छ । क्लबले जारी सिजनको बाँकी खेलहरूमा सुधारिएको प्रदर्शनको अपेक्षासहित नेतृत्व परिवर्तनको कठोर निर्णय लिएको हो ।
सन् २०२४ को नोभेम्बरमा ठूलो उत्साह र अपेक्षाका साथ युनाइटेडको मुख्य प्रशिक्षकमा नियुक्त भएका अमोरिमको कार्यकाल उतारचढावपूर्ण रह्यो । उनको प्रशिक्षणमा युनाइटेडले गत मे महिनामा स्पेनको बिल्बाओमा सम्पन्न यूईएफए युरोपा लिगको फाइनलसम्मको यात्रा तय गरेको थियो, जुन उनको कार्यकालको एक सुखद पक्ष मानिन्छ । तर, प्रिमियर लिगमा भने टोलीले सोचेअनुरुपको नतिजा निकाल्न संघर्ष गरिरह्यो । गत सिजन युनाइटेड लिगको १५औँ स्थानमा खुम्चिन पुगेको थियो, जुन क्लबको इतिहासकै खराब प्रदर्शनमध्ये एक थियो । हाल टोली लिगको छैठौँ स्थानमा संघर्षरत छ ।
तथ्यांक हेर्दा अमोरिमले युनाइटेडको म्यानेजरका रूपमा कुल ६३ खेलमा नेतृत्व सम्हाले । तर, नतिजा मिश्रित रह्यो । उनले खेलाएका खेलहरूमध्ये आधामा युनाइटेड जितविहीन बन्यो । उनको नेतृत्वमा टोलीले २४ जित, १८ बराबरी र २१ खेलमा पराजय भोग्यो । समग्रमा उनको जित प्रतिशत ३८.१ मात्र रह्यो, जुन युनाइटेडजस्तो महत्त्वाकांक्षी क्लबका लागि पर्याप्त मानिएन । क्लबले जारी गरेको विज्ञप्तिमा नेतृत्व बदल्नका लागि यो नै उपयुक्त समय भएको र नयाँ नेतृत्वसँगै सिजनको अन्त्यसम्म राम्रो स्थान हासिल गर्ने अपेक्षा राखिएको उल्लेख छ ।
रुबेन अमोरिमको व्यक्तिगत खेल जीवनको कुरा गर्दा, उनी युरोपेली फुटबलका एक चर्चित व्यक्तित्व हुन् । पोर्चुगलको राजधानी लिस्बनमा जन्मिएका अमोरिमले आफ्नो व्यावसायिक फुटबल करियर सन् २००३ मा पोर्चुगिज क्लब ‘बेलेनेन्सेस’ बाट सुरु गरेका थिए । एक प्रभावशाली मिडफिल्डरका रूपमा उनले बेन्फिका र ब्रागाजस्ता शीर्ष क्लबहरूबाट खेलेर धेरै उपाधिहरू जितेका छन् । खेलाडी जीवनबाट सन्यास लिएपछि उनले सन् २०१८/१९ तिर प्रशिक्षण करियर सुरु गरेका थिए । म्यानचेस्टर युनाइटेड आउनुअघि उनले पोर्चुगलको स्पोर्टिङ सीपीलाई १९ वर्षपछि लिग उपाधि जिताएर विश्व फुटबलमा आफ्नो रणनीतिक कौशलको छाप छोडेका थिए ।
क्लबले अमोरिमलाई उनको योगदानका लागि धन्यवाद दिँदै भविष्यको शुभकामना व्यक्त गरेको छ । उनको बहिर्गमनसँगै रिक्त रहेको स्थानमा तत्कालका लागि ड्यारेन फ्लेचरले जिम्मेवारी सम्हाल्नेछन् । फ्लेचरले बुधबार हुने बर्न्लीविरुद्धको खेलमा टोलीको नेतृत्व गर्नेछन् । अब युनाइटेडले नयाँ स्थायी प्रशिक्षकको खोजी सुरु गर्ने वा फ्लेचरलाई नै निरन्तरता दिने भन्ने विषयमा फुटबल जगतको ध्यान केन्द्रित भएको छ ।
