हेलसिन्की — स्टार्टअपको नयाँ सोच र जोस बोकेर पनि लगानी, सही मार्गदर्शन र नेटवर्कको अभावमा अलमलिएका नेपाली युवा उद्यमीहरूलाई लक्षित गर्दै फिनल्यान्डको राजधानी हेलसिन्कीमा एक ऐतिहासिक सम्मेलनको आयोजना हुने भएको छ । आगामी मार्च १३ तारिखका दिन आयोजना हुन लागेको ‘बाटो समिट २०२६‘ ले युरोपमा रहेका नेपाली डायस्पोराको उद्यमशीलता यात्रामा एक कोसेढुङ्गा सावित हुने अपेक्षा गरिएको छ ।
फिनल्यान्ड र सिङ्गो युरोपेली क्षेत्रमा रहेका नेपाली समुदायभित्र अद्भूत प्रतिभा र महत्त्वाकाङ्क्षा भए पनि उद्यमशीलताको अभ्यास भने अझै प्रारम्भिक चरणमै सीमित रहेको अवस्थालाई चिर्न यो समिट केन्द्रित रहनेछ । ‘नेपाली उद्यमशील मानसिकताको निर्माण’ भन्ने मुख्य नाराका साथ आयोजना हुन लागेको यस सम्मेलनले नर्डिक तथा युरोपेली मुलुकहरूका १५० भन्दा बढी नेपाली तथा अन्तर्राष्ट्रिय संस्थापक, लगानीकर्ता र स्टार्टअप प्रेमीहरूलाई एउटै छानामा गोलबन्द गर्नेछ ।
आयोजक संस्था ‘Bato Oy’ का संस्थापक तथा प्रमुख कार्यकारी अधिकृत विकास गुरुङका अनुसार, यो समिटको मुख्य उद्देश्य नै विदेशमा रहेका नेपालीहरूलाई जागिरे मानसिकताबाट माथि उठेर कम्पनी नै खोल्ने र जोखिम मोल्ने आँट प्रदान गर्नु हो । विगत दुई दशकदेखि फिनल्यान्डमा रहँदै आएका र त्यहाँको प्रतिष्ठित ‘Slush’ जस्ता ठूला कार्यक्रमहरूको व्यवस्थापनमा अनुभव सँगालेका गुरुङले नेपालीहरूलाई यहाँको मूलधारको स्टार्टअप इकोसिस्टममा सक्रिय गराउन यो मञ्च तयार पारिएको बताएका छन् । उनका अनुसार यसले अर्को पुस्ताका नेपाली संस्थापकहरूका लागि उद्यमशीलतालाई एक विश्वसनीय र यथार्थपरक भविष्यको रूपमा स्थापित गर्नेछ ।
सम्मेलनको भव्यता र यसको गाम्भीर्यलाई पुष्टि गर्न स्टार्टअप र लगानी क्षेत्रका विश्वस्तरीय दिग्गजहरूको उपस्थिति रहनेछ । कार्यक्रममा नर्डिक क्षेत्रकै ठूलो स्टार्टअप क्याम्पस मानिने ‘Maria01’ की प्रमुख कार्यकारी अधिकृत सरिता रुनेबर्ग र एन्टर फिनल्यान्डका जनरल पार्टनर युस्सी कालसभुओले आफ्नो अनुभव र अन्तरदृष्टि साझा गर्नेछन् । त्यस्तै, संयुक्त राज्य अमेरिकाबाट मोमो भीसीकी जनरल पार्टनर प्रीति अधिकारी र सिसुकेयरका संस्थापक विजय बानियाँको विशेष उपस्थिति रहनेछ भने डेनमार्कबाट नर्डिक मेकर्सकी निमा सोफिया टिसडाल र फिनल्यान्डमै कार्यरत रेसिमेटरका संस्थापक वरुण बस्यालले पनि वक्ताका रूपमा नयाँ उद्यमीहरूलाई मार्गदर्शन गर्नेछन् ।
फिनल्यान्ड बाहेक डेनमार्क, जर्मनी, बेलायत र अमेरिकाबाट समेत सहभागीहरू आउने यो कार्यक्रममा मुख्य मन्तव्य, प्यानल छलफल, नेटवर्किङ सेसन र स्टार्टअप प्रदर्शनीहरू समावेश गरिएका छन् । यसबाट सहभागीहरूले नर्डिक लगानीको वातावरणबारे व्यावहारिक ज्ञान मात्र पाउने छैनन्, बरु यस क्षेत्रमा सङ्घर्ष गरेर कम्पनी खडा गरिरहेका नेपाली संस्थापकहरूको वास्तविक कथाहरूबाट प्रेरणा समेत लिन सक्नेछन् । फिनल्यान्ड विश्वकै उत्कृष्ट स्टार्टअप इकोसिस्टम भएको देश मानिए पनि नेपाली मूलका स्टार्टअपहरूको सङ्ख्या न्यून रहेको परिप्रेक्ष्यमा, ‘बाटो समिट’ ले त्यो खाडल पुर्दै नेपाली उद्यमशीलतालाई विश्व बजारमा प्रतिस्पर्धी बनाउन महत्त्वपूर्ण भूमिका खेल्ने विश्वास लिइएको छ ।
