पोर्चुगल — पोर्चुगलको राष्ट्रिय फुटबल टोलीले आउँदो जुन १० मा लेइरियाको ‘मगाल्हेस पेसोआ स्टेडियम’ मा एउटा विशेष मैत्रीपूर्ण खेल खेल्ने भएको छ । विश्वकप यात्रा सुरु हुनुभन्दा ठीक अघि खेलिने यो अन्तिम खेल केवल अभ्यासका लागि मात्र नभई, हालैको प्राकृतिक विपद्बाट पिल्सिएका लेइरियाका जनताहरूप्रति ऐक्यबद्धता जनाउन आयोजना गर्न लागिएको हो ।
केही हप्ताअघि आएको विनाशकारी आँधीबेहरी र बाढीले लेइरिया क्षेत्रका धेरै संरचनाहरूमा क्षति पुर्याएको थियो । यस दुखद घडीमा स्थानीय बासिन्दा र खेलकुद क्लबहरूलाई मद्दत गर्न पोर्चुगल फुटबल महासंघ (FPF) ले यो सह्रानीय कदम चालेको हो । यस खेलबाट सङ्कलन हुने आम्दानीको एक हिस्सा प्रकोपबाट सबैभन्दा बढी प्रभावित स्थानीय क्लब र संघसंस्थाहरूको पुनर्स्थापनाका लागि दान गरिनेछ ।
हालसम्म पोर्चुगलको प्रतिद्वन्द्वी टोलीको टुङ्गो नलागे पनि, यो खेलले राष्ट्रिय टोली र लेइरियाका जनताबीचको सामीप्यता र समर्थनलाई बलियो बनाउने विश्वास गरिएको छ ।
यस मानवीय कार्यलाई थप प्रभावकारी बनाउन FPF ले प्राकृतिक प्रकोपका लागि तत्काल सहयोग कोष सक्रिय गरेको छ । आँधीबेहरीबाट प्रभावित क्लबहरूले अब १ लाख युरो सम्मको आर्थिक सहायताका लागि आवेदन दिन सक्नेछन् । आर्थिक सहयोगका अलावा, महासंघले आफ्ना भौतिक संरचनाहरू गुमाएका क्लबहरूका लागि ‘सिदादे दो फुतेबोल’ (फुटबल सिटी) का ढोकाहरू पनि खुला गरिदिएको छ । विशेष गरी, ‘युनियाओ डे लेइरिया’ जस्ता क्लबहरूले आफ्ना व्यावसायिक प्रतियोगिताहरू अवरुद्ध नहुनका लागि यी सुविधाहरूको प्रयोग गर्न पाउनेछन् ।
यो पहलको मुख्य उद्देश्य प्रभावित क्षेत्रका तत्कालका आवश्यकताहरूलाई सम्बोधन गर्नु र खेलकुद गतिविधिहरूलाई सामान्य अवस्थामा फर्काउनु हो । साथै, भविष्यमा यस्ता प्राकृतिक विपत्तिहरूको प्रभावलाई न्यूनीकरण गर्न र रोकथामका लागि बलियो संरचनात्मक रणनीति तयार पार्ने लक्ष्य पनि यस परियोजनाले राखेको छ ।
