साइप्रस — मध्यपूर्वमा बढ्दै गएको इरान र इजरायल बीचको सैन्य तनावका कारण साइप्रसको हवाई क्षेत्रमा ठुलो प्रभाव परेको छ । यस युद्धको प्रत्यक्ष असर स्वरूप साइप्रसका दुई प्रमुख विमानस्थलहरूमा उडानको अवस्था फरक–फरक देखिएको छ ।
पछिल्लो विवरण अनुसार पाफोस अन्तर्राष्ट्रिय विमानस्थलले आफ्नो उडान तालिकालाई पूर्ण रूपमा पुरानै लयमा फर्काउन सफल भएको छ । उक्त विमानस्थलबाट हुने उडानहरू अहिले नियमित रूपमा सञ्चालन भइरहेका छन्, जसले गर्दा यात्रुहरूलाई केही राहत मिलेको छ ।
यद्यपि, लार्नाका अन्तर्राष्ट्रिय विमानस्थलको अवस्था भने अझै पनि चुनौतीपूर्ण बनेको छ । क्षेत्रीय तनाव र सुरक्षा संवेदनशीलताका कारण लार्नाकाबाट हुने दर्जनौँ उडानहरू रद्द गरिएका छन् । विशेषगरी मध्यपूर्वी देशहरू र छिमेकी क्षेत्रतर्फ उड्ने विमानहरू प्रभावित भएका हुन् । उडान रद्द हुँदा सयौँ यात्रुहरू विमानस्थलमा अलपत्र परेका छन् भने कतिपय विमानहरूलाई अन्य सुरक्षित गन्तव्यतर्फ मोडिएको छ। विभिन्न वायुसेवा प्रदायक कम्पनीहरूले सुरक्षाको कारण देखाउँदै आफ्ना सेवाहरू तत्कालका लागि स्थगित गरेका छन् ।
विमानस्थल व्यवस्थापन निकाय ‘हर्मिस एयरपोर्ट्स’ ले दिएको जानकारी अनुसार स्थिति अहिले पनि परिवर्तनशील छ । अधिकारीहरूले क्षेत्रीय घटनाक्रमलाई नजिकबाट नियालिरहेका छन् र सुरक्षा निकायहरूसँग निरन्तर समन्वय गरिरहेका छन् । पाफोस विमानस्थलमा उडानहरू सामान्य बने पनि लार्नाकाको हकमा भने हवाई क्षेत्रको सुरक्षा सुनिश्चित नहुँदासम्म केही अनिश्चितता कायमै रहने देखिएको छ ।
यस्तो विषम परिस्थितिमा यात्रा गर्ने तयारीमा रहेका यात्रुहरूलाई आफ्नो उडानको पछिल्लो अवस्थाबारे सम्बन्धित वायुसेवा कम्पनीसँग बुझ्न वा विमानस्थलको आधिकारिक वेबसाइट नियमित चेक गर्न आग्रह गरिएको छ । मध्यपूर्वको युद्धले हवाई मार्गमा अवरोध सिर्जना गरेपछि साइप्रसले आफ्ना नागरिक र पर्यटकहरूको सुरक्षालाई उच्च प्राथमिकतामा राखेर काम गरिरहेको छ ।
