पोर्चुगल — चर्चित मिडिया तथा वित्तीय वेबसाइट ‘इनसाइडर मङ्की’ले विश्वका सबैभन्दा सुन्दर महिलाहरू हुने शीर्ष ५० देशहरूको सूची सार्वजनिक गरेको छ । विभिन्न मापदण्ड र तथ्याङ्कका आधारमा तयार पारिएको यो सूचीले विश्वभरको सौन्दर्यको विविधतालाई उजागर गरेको छ, जसमा एसिया, युरोप र ल्याटिन अमेरिकी देशहरूको वर्चस्व देखिएको छ ।
सार्वजनिक सूचीको शीर्ष स्थानमा एसियाली मुलुक दक्षिण कोरिया पर्न सफल भएको छ। कोरियाली सौन्दर्य प्रसाधन (K-Beauty) र त्यहाँका महिलाहरूको छालाको स्याहार तथा फेसन सेन्सले विश्वभर प्रभाव जमाइरहेको बेला दक्षिण कोरियाले ब्राजिल र अमेरिकालाई पछि पार्दै पहिलो नम्बरमा बाजी मारेको हो । सूचीको दोस्रो स्थानमा ल्याटिन अमेरिकी देश ब्राजिल र तेस्रोमा संयुक्त राज्य अमेरिका रहेका छन् । त्यस्तै, चौथोमा जापान र पाँचौंमा मेक्सिकोले आफ्नो स्थान सुरक्षित गरेका छन्, जसले सौन्दर्यको मामलामा भौगोलिक विविधतालाई प्रस्ट पार्दछ।
युरोपेली राष्ट्रहरूको बाहुल्यता रहेको यस सूचीमा पोर्चुगल पनि समेटिएको छ । ४५ औं स्थानमा रहेको पोर्चुगलले पनि विश्वका उत्कृष्ट ५० भित्र आफ्नो उपस्थिति जनाउँदै पोर्चुगिज महिलाहरूको सौन्दर्यलाई अन्तर्राष्ट्रिय मञ्चमा चिनाएको छ ।
युरोपबाट जर्मनी (छैटौं), इटाली (नवौं) र फ्रान्स (बाह्रौं) जस्ता देशहरू अग्रपंक्तिमा रहँदा पोर्चुगलले रोमानिया र मोरक्कोको बीचमा आफ्नो स्थान बनाएको छ ।
छिमेकी राष्ट्र भारतले पनि यो सूचीमा १८ औं स्थान ओगटेको छ भने अर्को छिमेकी चीन २१ औं स्थानमा छ। दक्षिण एसियाली र मध्यपूर्वी देशहरूको उपस्थिति पनि सूचीमा बाक्लै देखिन्छ। सौन्दर्य प्रतियोगिताहरूमा सधैं चर्चामा रहने भेनेजुएला १० औं स्थानमा छ भने कोलम्बिया सातौं स्थानमा अटाएको छ। यो सूचीले शारीरिक सुन्दरता मात्र नभई ती देशहरूको फेसन, संस्कृति र विश्वव्यापी प्रभावलाई समेत प्रतिबिम्बित गरेको मान्न सकिन्छ ।
