पोर्चुगल — राहदानी विभागले पोर्चुगलसहित विभिन्न मुलुक र नेपालका विभिन्न जिल्लाहरूमा तयार भएका राहदानीहरू पठाउने प्रक्रिया सुरु गरेको छ । विभागले मिति २०८२ मंसिर ११ गते एक सूचना जारी गर्दै सन् २०२५ नोभेम्बर १ सम्म आवेदन दिएका सेवाग्राहीहरूको राहदानी तयार भएको जनाएको हो ।
विशेषगरी पोर्चुगलमा रहेका नेपालीहरूका लागि यो खबर महत्त्वपूर्ण रहेको छ । विभागका अनुसार पोर्चुगलका लागि ४६ थान राहदानी तयार भई पठाउने क्रममा रहेका छन् । युरोपेली मुलुकहरूमध्ये पोर्चुगलमा नेपालीहरूको बाक्लो उपस्थिति रहेकाले त्यहाँबाट राहदानी नवीकरण र नयाँ बनाउनेको चाप रहँदै आएको छ ।
पोर्चुगल बाहेक अन्य देशहरूको अवस्था विभागले वैदेशिक रोजगारीको प्रमुख गन्तव्य कतारका लागि सबैभन्दा धेरै राहदानी तयार पारेको छ । सूचना अनुसार कतारका लागि १ हजार ४ सय ८४ थान राहदानी पठाइँदैछ । त्यस्तै, जापानका लागि ६६ र जर्मनीका लागि २९ थान राहदानी तयार भएका छन् ।
झापा र धादिङमा उच्च संख्या स्वदेशतर्फका जिल्लाहरूमा झापा जिल्लाका लागि सबैभन्दा बढी राहदानी तयार भएका छन् । झापाका लागि १ हजार ६ सय ७२ राहदानी पठाउने तयारी छ भने धादिङका लागि १ हजार ६ राहदानी तयार भएका छन् ।
राहदानी विभागले सन् २०२५ नोभेम्बर १ सम्म आवेदन दिएका सम्बन्धित सेवाग्राहीहरूलाई आफ्नो राहदानी बुझ्नका लागि सम्बन्धित जिल्ला प्रशासन कार्यालय वा विदेशस्थित नेपाली दूतावासमा सम्पर्क राख्न अनुरोध गरेको छ । राहदानी सम्बन्धित स्थानमा पुग्न केही समय लाग्न सक्ने भएकाले बुझ्न जानुअघि सम्बन्धित कार्यालयको सूचना हेर्न पनि आग्रह गरिएको छ ।
