पोर्चुगल (लिस्बन) — पोर्चुगलको खाद्य तथा आर्थिक सुरक्षा प्राधिकरण (ASAE) ले हालै गरेको एक व्यापक बजार अनुगमन तथा निरीक्षणका क्रममा ‘क्यानाबिस स्याटिभा’ मिसिएका ठूलो परिमाणका खाद्य उत्पादनहरू नियन्त्रणमा लिएको छ । जनस्वास्थ्य र उपभोक्ता सुरक्षामा गम्भीर जोखिम निम्त्याउन सक्ने भन्दै प्राधिकरणले ३ हजा ५ सय भन्दा बढी त्यस्ता वस्तुहरू जफत गर्नुका साथै नियम उल्लंघन गर्ने व्यवसायीहरू विरुद्ध कानुनी कारबाही अगाडि बढाएको छ ।
विगत केही सातादेखि ASAE ले देशका प्रमुख औद्योगिक तथा पर्यटकीय क्षेत्रहरू मानिने पोर्टो, ब्रागा, एभेइरो र गुइमारेसमा विशेष निगरानी अभियान सञ्चालन गरेको थियो । खाद्य पूरक र विशिष्ट खाद्य उत्पादनहरूको बिक्रीमा संलग्न व्यवसायहरूमा गरिएको छापाका क्रममा कुल ३ हजार ५ सय ८८ वटा वस्तुहरू जफत गरिएको हो । प्राधिकरणका अनुसार यी उत्पादनहरूले जनस्वास्थ्य, उपभोक्ताको सुरक्षा र बजारको विश्वसनीयतामा प्रत्यक्ष चुनौती खडा गरेका थिए । अनुगमनका क्रममा कैफियत भेटिएपछि ६ वटा व्यावसायिक प्रतिष्ठानविरुद्ध अवैध ओसारपसार र गैरकानुनी गतिविधिमा संलग्न भएको आरोपमा आपराधिक मुद्दा दर्ता गरिएको छ ।
जफत गरिएका सामग्रीहरूमा ‘क्यानाबिस स्याटिभा एल’ बिरुवाका संवेदनशील भागहरू फेला परेका छन् । यसमा मुख्यतया बिरुवाका पातहरू, फूल फुल्ने वा फल्ने टुप्पाहरू, चरस, रेजिन र परागकणहरू समावेश छन् । यसका साथै, मानव तथा पशु उपभोगका लागि बजारमा पठाइएका विभिन्न खाद्य प्याकेटहरू पनि जफत गरिएको छ, जसमा सुरक्षा मापदण्ड, लेबलिङ र गुणस्तरका आधारभूत कानुनी सर्तहरू पालना गरिएको थिएन । कानुनतः यस्ता पदार्थहरूको कब्जा र बिक्री वितरण अत्यन्त कडा नियमनको अधीनमा रहन्छ ।
ASAE ले सार्वजनिक गरेको विज्ञप्ति अनुसार, ‘क्यानाबिस स्याटिभा एल’ बिरुवाका फूल, पात वा यसका अर्कहरूलाई सामान्य खाना वा खाद्य सामग्रीका रूपमा बजारमा बिक्री वितरण गर्न पूर्ण रूपमा निषेध गरिएको छ । विशेषगरी, क्यानाबिडियोल (CBD) जस्ता क्यानाबिनोइड्स भएका अर्कहरूलाई खाद्य पदार्थ वा ‘फूड एडिटिभ्स’ को रूपमा प्रयोग गर्नु गैरकानुनी मानिन्छ ।
प्राधिकरणले स्पष्ट पारेको छ कि CBD सांद्रता भएका ‘क्यानाबिस स्याटिभा’ का अर्कहरूलाई “नयाँ खाना” को श्रेणीमा राखिएको छ । यस्ता पदार्थहरूले मानव स्वास्थ्यमा पार्ने प्रभावहरूबारे वैज्ञानिक रूपमा पूर्ण जानकारी उपलब्ध नभएको र यसले उपभोक्ताको जीवन वा शारीरिक स्वास्थ्यमा जोखिम निम्त्याउन सक्ने सम्भावना रहेकाले खानामा यसको प्रयोगलाई अनुमति दिइएको छैन । यसै कारणले गर्दा ASAE ले बजारमा आउने यस्ता उत्पादनहरूमाथि शून्य सहनशीलताको नीति अपनाउँदै कडा निगरानी जारी राख्ने जनाएको छ ।
