रोम (इटाली) — इटाली र भारतबीचको हवाई सम्पर्कलाई थप विस्तार र सुदृढ बनाउने उद्देश्यका साथ, एयर इन्डियाले रोम र नयाँ दिल्लीबीच सीधा उडान सेवा पुन: सञ्चालन गर्ने भएको छ । यसै सन्दर्भमा इटालीका लागि एयर इन्डियाका कन्ट्री म्यानेजर श्री राहुल भोंगाडेले इटालीका लागि भारतीय राजदूत महामहिम वाणी रावसँग विशेष भेटवार्ता गर्नुभएको छ । उक्त भेटमा राजदूत रावले आगामी २५ मार्च २०२६ देखि सुरु हुन लागेको यो सीधा उडान सेवाको न्यानो स्वागत गर्नुभयो ।
यो नयाँ उडान सेवाले हाल सञ्चालनमा रहेको मिलान-दिल्ली रुटलाई थप टेवा पुर्याउने विश्वास लिइएको छ । रोमबाट सुरु हुने यो सेवाले यात्रुहरूलाई थप विकल्प प्रदान गर्नुका साथै दुई देशबीचको कनेक्टिभिटीलाई अझ प्रभावकारी बनाउनेछ । यसअघि मिलान केन्द्रित रहेको हवाई सेवा अब इटालीको राजधानी रोमसँग पनि सिधै जोडिने हुँदा यसले रणनीतिक रूपमा ठूलो महत्त्व राख्नेछ ।
यो सीधा हवाई सम्पर्कले भारत र इटालीबीचको द्विपक्षीय सम्बन्धका विविध पक्षहरूमा सकारात्मक प्रभाव पार्ने अपेक्षा गरिएको छ । विशेष गरी, यसले दुई देशबीचको बढ्दो व्यावसायिक तथा व्यापारिक सम्बन्धलाई अझ प्रगाढ बनाउन मद्दत पुर्याउनेछ । सीधा उडानको सुविधाले व्यापारी तथा व्यवसायीहरूको आवतजावतलाई सहज बनाउँदै आर्थिक गतिविधिलाई प्रोत्साहन गर्नेछ । साथै, पर्यटन क्षेत्रमा पनि यसले उल्लेखनीय योगदान पुर्याउने विश्वास गरिएको छ, जसले गर्दा दुई देशका नागरिकहरू बीचको सांस्कृतिक आदानप्रदानमा समेत वृद्धि हुनेछ ।
सबैभन्दा महत्त्वपूर्ण कुरा, इटालीमा बसोबास गरिरहेको ठूलो भारतीय समुदायका लागि यो समाचार अत्यन्तै राहतपूर्ण सावित हुनेछ । रोजगारी, अध्ययन तथा व्यवसायका सिलसिलामा इटालीमा रहेका हजारौं भारतीयहरूलाई स्वदेश फर्कन वा भारतबाट इटाली जान यसले निकै सहज र छरितो माध्यम प्रदान गर्नेछ । लामो ट्रान्जिट र झन्झटिलो यात्रा गर्नुपर्ने बाध्यता हट्दै जाने हुँदा यो निर्णयले डायस्पोरा समुदायमा खुसीको माहोल सिर्जना गरेको छ ।
