पोर्चुगल — पोर्चुगलका प्रधानमन्त्रीले आज, जुलाई १०, २०२५ मा राष्ट्रिय ध्वजावाहक वायुसेवा कम्पनी, ट्याप एयर पोर्चुगलको भविष्यबारे एक महत्वपूर्ण घोषणा गरेका छन् । लामो समयदेखिको अनिश्चितता र बहसलाई अन्त्य गर्दै, सरकारले ट्याप एयरलाइन्सको पूर्ण निजीकरण गर्ने निर्णय गरेको छ ।
प्रधानमन्त्री कार्यालयमा आयोजित एक विशेष पत्रकार सम्मेलनलाई सम्बोधन गर्दै प्रधानमन्त्री लुइस मोन्टेनेग्रोले भने, “हामीले राष्ट्रिय हित र ट्याप एयर पोर्चुगलको दिगो भविष्य सुनिश्चित गर्न यो साहसिक तर आवश्यक कदम चालेका छौं । सरकारको यो निर्णयले एयरलाइन्सलाई थप प्रतिस्पर्धी बनाउने, यसको सञ्जाल विस्तार गर्ने र यात्रुहरूका लागि सेवाको गुणस्तर बढाउने विश्वास लिएका छौं’ ।
यो घोषणासँगै ट्याप एयरलाइन्सको व्यवस्थापन र स्वामित्वमा ठूलो परिवर्तन आउने निश्चित भएको छ । सरकारले निजीकरण प्रक्रियालाई पारदर्शी र व्यवस्थित बनाउन एक विशेष समिति गठन गरेको जनाएको छ ।
सम्भावित लगानीकर्ताहरूमा विश्वका ठूला एयरलाइन्स समूहहरू र लगानी कोषहरूले चासो देखाउन सक्ने अनुमान गरिएको छ ।
सरकारका अनुसार निजीकरणबाट प्राप्त हुने रकम राष्ट्रिय ऋण घटाउन र अन्य अत्यावश्यक सार्वजनिक सेवाहरूमा लगानी गर्न प्रयोग गरिनेछ । यद्यपि, सरकारले निजीकरणपछि पनि पोर्चुगलको राजधानी लिस्बनलाई ट्यापको मुख्य हबको रूपमा कायम राख्नुपर्ने र राष्ट्रिय हितका महत्वपूर्ण हवाई मार्गहरूलाई निरन्तरता दिनुपर्ने जस्ता शर्तहरू राख्नेछ ।
विपक्षी दलहरू र केही युनियनहरूले भने सरकारको यो निर्णयको आलोचना गरेका छन् । उनीहरूले राष्ट्रिय सम्पत्तिलाई निजी हातमा सुम्पिँदा यसले कर्मचारीहरूको रोजगारी र सेवाको पहुँचमा नकारात्मक असर पार्न सक्ने चिन्ता व्यक्त गरेका छन् ।
सन् २०२१ मा कोभिड-१९ महामारीको असरपछि आर्थिक संकटमा फसेको ट्याप एयरलाइन्सलाई पोर्चुगल सरकारले राष्ट्रियकरण गरेर डुब्नबाट जोगाएको थियो । त्यसयता युरोपेली आयोगको स्वीकृतिमा एयरलाइन्सले पुनर्संरचना योजना लागू गरिरहेको थियो । आजको यो घोषणाले ट्याप एयर पोर्चुगलको इतिहासमा एक नयाँ अध्यायको सुरुवात गरेको छ ।
