ब्रसेल्स, बेल्जियम — नेपालमा प्रदर्शन आरम्भ भएदेखि नै बक्स अफिसमा उच्च सफलता हासिल गरेको र २०८२ सालको सर्वाधिक कमाउने चलचित्र बन्न सफल ‘परान’ अब युरोपेली मुलुक बेल्जियममा पनि प्रदर्शन हुने भएको छ । स्वदेशमा कीर्तिमानी व्यापारसहित दर्शकको मन जितेको यो चलचित्रलाई युरोपमा रहेका नेपाली दर्शकहरूको माग बमोजिम बेल्जियमका प्रमुख सहरहरूमा देखाइने भएको हो ।
यस चलचित्रको आधिकारिक युरोप वितरकको रूपमा मामा ईभेन्ट्स र गुरुङ केएनएस इन्टरटेन्मेन्ट्स रहेका छन् । ‘नेपाली भाषा, नेपाली संस्कृति र नेपाली चलचित्रलाई माया र प्रवर्द्धन गरौँ’ भन्ने मूल नाराका साथ स्थापना भएका दुई संस्थाले संयुक्त आयोजनामा चलचित्र प्रदर्शन गर्न लागेको हो ।
विगत लामो समयदेखि युरोपमा नेपाली चलचित्र तथा सांस्कृतिक कार्यक्रमहरू आयोजना गर्दै आएका संस्थाहरूले युरोपमा रहेका नेपाली दर्शकहरूको अत्याधिक मागका कारण बेल्जियम लगायत अन्य देशहरूमा पनि ‘परान’ प्रदर्शनको चाँजोपाँजो मिलाएको गुरुङ केएनएस इन्टरटेन्मेन्ट्सका सञ्चालक किरण गुरुङले जानकारी दिनुभयो ।
बेल्जियममा रहेका नेपाली सिनेप्रेमीहरूका लागि पायक पर्ने गरी विभिन्न मिति र समयमा शोहरू तय गरिएका छन् । आयोजकले सार्वजनिक गरेको तालिका अनुसार आगामी ७ डिसेम्बर आइतबारका दिन दुईवटा सहरमा प्रदर्शन हुनेछ । सो दिन किनेपोलिस गेन्टमा साँझ ५ बजे र किनेपोलिस एन्टवर्पमा साँझ ५:३० बजे चलचित्र हेर्न सकिनेछ । त्यसैगरी, ८ डिसेम्बर सोमबारका दिन किनेपोलिस ब्रसेल्स, किनेपोलिस लुभेन र किनेपोलिस ब्रुग गरी तीनवटै स्थानमा एकसाथ बेलुका ७:३० बजे चलचित्रको भव्य प्रदर्शन हुने तय भएको छ ।
दर्शकहरूको सुविधालाई ध्यानमा राख्दै आयोजकले टिकट अनलाइनमार्फत नै लिन सकिने व्यवस्था मिलाएको छ । इच्छुक दर्शकले उपलब्ध गराइएको लिङ्कमा क्लिक गरेर अग्रिम टिकट बुकिङ गर्न सक्नेछन् । नेपालमा ब्लकबस्टर सावित भएको ‘परान’ ले प्रवासमा रहेका नेपालीहरूलाई पनि भरपुर मनोरञ्जन प्रदान गर्ने विश्वास लिइएको छ ।
अर्को वर्ष नेपालमा प्रदर्शन हुने ठूलो ब्यानरमा बनेको दुईवटा चलचित्र आयोजक ‘मामा ईभेन्ट्स र गुरुङ केएनएस इन्टरटेन्मेन्ट्’ ले संयुक्त रुपमा युरोपको विभिन्न देशहरूमा समेत प्रदर्शन गराउने भएको छ । उक्त दुई ठूला ब्यानरमा निर्माण भएको चलचित्रले युरोपमा रहेका नेपालीहरूले चलचित्र क्षेत्रको छुट्टै स्वाद समेत पाउने आशा राखेको छ ।
