पोर्चुगल — पोर्चुगलको आप्रवासी तथा शरणार्थी मामिला एजेन्सी (एआईएमए) ले आप्रवासीहरूले पेश गर्नुपर्ने आवासको प्रमाण (Proof of Accommodation) सम्बन्धी नियमहरूलाई थप स्पष्ट र व्यवस्थित बनाएको छ । नयाँ निर्देशिका अनुसार, अब आवेदकले आवासको प्रमाण पेश गर्दा अनिवार्य रूपमा ‘शपथपत्र’ (Affidavit/Termo de Responsabilidade) संलग्न गर्नुपर्ने भएको छ ।
एआईएमएले आफ्नो वेबसाइटमा उपलब्ध गराएको आधिकारिक टेम्प्लेट अनुसार तयार पारिएको यो शपथपत्रमा आवेदकको आवासीय ठेगाना र उनीहरूले प्रयोग गरिरहेको सम्पत्तिको कानुनी अधिकार (जस्तै: स्वामित्व, भाडा वा ऋण) स्पष्ट रूपमा खुलाइएको हुनुपर्छ ।
कसले के कागजपत्र पेश गर्ने ?
आवेदकको बसोबासको प्रकृति अनुसार पेश गर्नुपर्ने कागजातहरूलाई एआईएमएले तीन भागमा वर्गीकरण गरेको छ । १. घरधनी भएमा : यदि आवेदक आफैं घरधनी हुन् भने, स्थायी सम्पत्ति प्रमाणपत्र (Permanent Property Certificate) वा वैध भौतिक प्रमाणपत्रको पहुँच कोड (Access Code) पेश गर्नुपर्नेछ । २. भाडामा बस्ने भएमा : भाडामा बस्नेहरूले घर भाडाको सम्झौता (Rent Contract) जसमा आवेदकको नाम उल्लेख भएको हुनुपर्छ र अघिल्लो महिनाको भाडा तिरेको रसिद बुझाउनुपर्नेछ । ३. ऋण सम्झौता (Loan Agreement) : यदि सम्पत्ति ऋण सम्झौता अन्तर्गत प्रयोग गरिएको हो भने, सो सम्झौता पत्र र स्थायी सम्पत्ति प्रमाणपत्र पेश गर्नुपर्नेछ ।
सम्झौतामा नाम नभएकाहरूका लागि विशेष नियम
पोर्चुगलमा धेरैजसो आप्रवासीहरू अरूको नाममा रहेको घर वा कोठामा बस्ने गरेका छन्, जहाँ उनीहरूको नाम घर भाडाको सम्झौतामा हुँदैन । यस्तो अवस्थामा एआईएमएले कडा नियम लागू गरेको छ ।
यदि आवेदकको नाम घर भाडा वा ऋण सम्झौतामा छैन भने, उनीहरूले बायोमेट्रिक वा अपोइन्टमेन्टको दिन निम्न दुई कागजात अनिवार्य पेश गर्नुपर्नेछ ।
स्वघोषणा पत्र : आवेदकले आफू सो स्थानमा वास्तवमै बसिरहेको र दिएको विवरण झूटा भएमा कानुन बमोजिम सजाय भोग्न तयार रहेको भनी शपथ लिनुपर्नेछ । यसमा घरधनीको पूरा नाम, कर नम्बर (NIF) र बस्ने कानुनी आधार (भाडा वा नि:शुल्क प्रयोग) खुल्नुपर्छ ।
कर कार्यालयको प्रमाणपत्र : आवेदकले कर प्राधिकरण (Finanças) बाट जारी गरिएको ३० दिन भन्दा पुरानो नभएको प्रमाणपत्र पेश गर्नुपर्छ, जसमा उनको कर निवास (Fiscal Address) सोही घरको ठेगानामा दर्ता भएको स्पष्ट देखिनुपर्छ ।
विद्यार्थीहरूका लागि छुट्टै व्यवस्था
व्यावसायिक, माध्यमिक वा उच्च शिक्षा अध्ययनरत विद्यार्थीहरूका लागि आवास प्रमाणको नियम केही लचिलो बनाइएको छ ।
यदि विद्यार्थीको नाम भाडा सम्झौतामा छैन भने, विद्यालय र निजी संस्थाबीच भएको सम्झौता र त्यसमा विद्यार्थीको नाम उल्लेख भएको विवरण पेश गर्न सकिन्छ । शैक्षिक संस्थाले विद्यार्थीको बसोबास प्रमाणित गरिदिएको आधिकारिक पत्रलाई पनि मान्यता दिइनेछ । विश्वविद्यालयको होस्टल (Residence) मा बस्नेहरूले सोही संस्थाबाट प्राप्त प्रमाणपत्र पेश गर्न सक्नेछन् ।
‘जुन्ता’ को प्रमाणपत्र प्रमाण नमानिने
सबैभन्दा महत्त्वपूर्ण कुरा, एआईएमएले अबदेखि स्थानीय वडा कार्यालय अर्थात् ‘जुन्ता द फ्रेगुएसिया’ द्वारा जारी गरिएको बसोबासको प्रमाणपत्रलाई आवासको आधिकारिक प्रमाणको रूपमा स्वीकार नगर्ने स्पष्ट पारेको छ ।
साथै, एआईएमएले एउटै घर वा अपार्टमेन्टमा कति जना मानिसहरूको बसोबास देखाइएको छ भनेर संख्याको पनि विश्लेषण गर्नेछ । यदि एउटै ठेगानामा अस्वभाविक रूपमा धेरै आवेदकहरू दर्ता भएको पाइएमा छानबिन हुन सक्ने बुझिएको छ । यो नयाँ नियमले धेरै आप्रवासीहरूलाई कागजात तयार पार्दा सचेत हुन सङ्केत गरेको छ । फारम र टेम्प्लेटहरू एआईएमएको आधिकारिक वेबसाइटमा उपलब्ध छन् ।
