लिस्बन (पोर्चुगल) — पोर्चुगलको लिस्बनस्थित नेपाली राजदूतावासले राहदानी आवेदन दिएका नेपाली नागरिकहरूका लागि वितरणसम्बन्धी महत्त्वपूर्ण सूचना जारी गरेको छ ।
राजदूतावासले हालसालै आवेदन दिएका सेवाग्राहीहरूमध्ये ‘लट ६’ (Lot 6) अन्तर्गतका राहदानीहरू बनेर आएको भन्दै सम्बन्धित आवेदकहरूलाई आफ्नो राहदानी बुझिलिन आग्रह गरेको हो ।
राजदूतावासद्वारा जारी सूचना अनुसार, वेबसाइटमा प्रकाशित नामावलीको लिङ्कमा नाम समावेश भएका आवेदकहरूले कार्यालय खुलेको दिन दिउँसो २ बजेपछि राजदूतावासमा उपस्थित भई आफ्नो राहदानी लिन सक्नेछन् । राहदानी लिन जाँदा आवेदकले अनिवार्य रूपमा आफूसँग भएको पुरानो सक्कल राहदानी र राजस्व बुझाएको रसिद साथमा लिएर जानुपर्नेछ ।
वितरण प्रक्रियालाई छिटो र सहज बनाउनका लागि राजदूतावासले आवेदकहरूलाई वेबसाइटको सूचीमा आफ्नो नाम कुन क्रम सङ्ख्या (S.No.) मा छ, सो टिपोट गरी कर्मचारीलाई जानकारी गराउन समेत विशेष अनुरोध गरेको छ ।
यदि कुनै कारणवश आवेदक स्वयं उपस्थित हुन नसक्ने अवस्था आएमा वारेस मार्फत पनि राहदानी बुझ्न सकिने व्यवस्था मिलाइएको छ । यसका लागि सम्बन्धित व्यक्तिले आफ्नो सक्कल राहदानी, रसिद र मञ्जुरीनामा पत्र वारेसलाई दिएर पठाउनुपर्नेछ ।
राहदानी वितरण कार्य लिस्बनको Rua Pero de Alenquer 29, 1400-069 स्थित राजदूतावासको कार्यालयबाट हुनेछ । राजदूतावासले कन्सुलर सेवाका लागि बिहान ९:१५ देखि १:१५ सम्मको समय तोकेको भए तापनि, तयार भएका राहदानी वितरण तथा सोसम्बन्धी जानकारीका लागि भने दिउँसो २ बजेपछिको समय निर्धारण गरिएको छ । सेवाग्राहीले आफ्नो राहदानी आए/नआएको यकिन गर्न राजदूतावासको आधिकारिक वेबसाइट वा फेसबुक पेजमा राखिएको ‘लट ६’ को सूची हेर्न सक्नेछन् ।
