लिस्बन (पोर्चुगल) — पोर्चुगिज इन्स्टिच्युट अफ द सी एण्ड एटमस्फियर (IPMA) ले आज शनिबारका लागि देशका विभिन्न भागमा मौसमको गम्भीर चेतावनी जारी गरेको छ । विशेषगरी तटीय र पहाडी क्षेत्रहरूमा मौसम प्रतिकूल रहने हुनाले सर्वसाधारणलाई उच्च सतर्कता अपनाउन आग्रह गरिएको छ । आजको मौसम पूर्वानुमानमा खतरनाक समुद्री छाल, तीव्र गतिको हावा, भारी वर्षा र तल्लो उचाइमै हिमपातको सम्भावना देखाइएको छ ।
सबैभन्दा चिन्ताजनक स्थिति समुद्री तटीय क्षेत्रमा रहेको छ । IPMA ले १० वटा जिल्लाहरूका लागि मध्यरातसम्मका लागि “रातो तह” को गम्भीर समुद्री चेतावनी जारी गरेको छ । उत्तरपश्चिमी दिशाबाट आउने छालहरूको उचाइ ७ देखि ९ मिटरसम्म हुने र अधिकतम उचाइ १५ मिटरसम्म पुग्न सक्ने चेतावनी दिइएको छ । १५ देखि १७ सेकेन्डको अवधिमा आउने यी विशाल छालहरूले तटीय संरचनामा क्षति पुर्याउन सक्ने जोखिम रहेको छ । दक्षिण तर्फको समुद्रमा पनि साढे ३ मिटरसम्मका छालहरू उठ्ने पूर्वानुमान गरिएको छ ।
हावाहुरीको हकमा पनि अवस्था जोखिमपूर्ण छ । बेजा र फारो जिल्लाहरूमा सुन्तला रङको चेतावनी जारी गरिएको छ, जहाँ पश्चिमी हावाको गति ११० किलोमिटर प्रति घण्टासम्म पुग्न सक्छ । पहाडी भूभागमा हावाको वेग अझ बढेर १२० किलोमिटर प्रति घण्टासम्म पुग्ने आँकलन गरिएको छ । साथै, लेइरिया, लिस्बन र सेतुबल क्षेत्रमा पनि दिउँसोसम्म हावाहुरीको पहेँलो चेतावनी कायम रहनेछ । विशेषगरी केप कार्भोइरो र साइन्सको दक्षिणी क्षेत्रमा हावाहुरीले जनजीवन प्रभावित पार्न सक्छ ।
यसका साथै, उत्तरी र मध्य पोर्चुगलमा हिमपातले जनजीवन कष्टकर बनाउने देखिएको छ । एभेइरो, ब्रागा, कास्टेलो ब्रान्को, कोइम्ब्रा, गार्डा, पोर्टो लगायतका ९ जिल्लाहरूमा बिहान १२ बजेसम्मका लागि हिमपातको रातो तथा सुन्तला तहको चेतावनी दिइएको छ । बिहान सबेरै २०० देखि ४०० मिटरको होचो भूभागमै हिउँ पर्न सक्ने र दिउँसोपछि हिमरेखा बढेर १२०० देखि १४०० मिटरसम्म पुग्ने बताइएको छ । भित्री भागहरूमा बरफ जम्ने र सडक चिप्लो हुने उच्च सम्भावना रहेकोले यातायातमा अवरोध आउन सक्छ ।
देशभरको आकाशमा बादल लाग्ने र धेरै स्थानमा असिना तथा मेघगर्जनसहित भारी वर्षाको सम्भावना छ । लिस्बन महानगरपालिका क्षेत्रमा बिहानपख असिना र मेघगर्जनसहितको वर्षा हुने र तटीय क्षेत्रमा ९० किलोमिटर प्रति घण्टासम्मको हावा चल्ने पूर्वानुमान छ ।
उता पोर्टोमा पनि दिनको अन्त्यतिर भारी वर्षा हुनुका साथै तटीय क्षेत्रमा ६५ किलोमिटर प्रति घण्टाको वेगमा हावा चल्नेछ ।
आज न्यूनतम तापक्रममा गिरावट आउनेछ भने मौसम अत्यधिक चिसो र तूफानी रहनेछ । IPMA ले तटीय गतिविधिहरू बन्द गर्न र अत्यावश्यक काम बाहेक यात्रा नगर्न सुझाव दिएको छ ।
