साइप्रस — सोमबार दिउँसो साइप्रसस्थित संयुक्त अधिराज्यको अक्रोटिरी वायुसेना अड्डामा नयाँ “सुरक्षा खतरा” उत्पन्न भएपछि त्यस क्षेत्रमा उच्च सतर्कता अपनाइएको छ । सुरक्षा संवेदनशीलतालाई ध्यानमा राख्दै बेलायती अड्डाका अधिकारीहरूले अड्डा खाली गर्ने निर्णय गरेसँगै साइप्रस सरकारले नजिकैको अक्रोटिरी गाउँलाई पनि पूर्ण रूपमा खाली गराउन निर्देशन दिएको छ ।
स्थानीय सञ्चारमाध्यम ‘साइप्रस मेल’ का अनुसार आन्तरिक मन्त्रालयले बेलायती सैन्य अड्डाको निर्णयलाई आधार मान्दै नागरिकको सुरक्षाका लागि उक्त गाउँ खाली गराउने कदम चालेको हो । यद्यपि, अक्रोटिरी आधार क्षेत्रभित्र पर्ने अन्य गाउँहरूमा भने हालसम्म खाली गर्ने कुनै निर्देशन दिइएको छैन ।
यसअघि सोमबार बिहान सबेरै १:१८ बजे अड्डाको रनवेमा एउटा “सानो ड्रोन” ले आक्रमण गरेको थियो । उक्त ड्रोन आक्रमणका कारण हवाई क्षेत्र प्रभावित भएको र रनवेमा सामान्य क्षति पुगेको पुष्टि भए पनि कुनै मानवीय हताहत भने भएको छैन । रातभरको उक्त घटनापछि सोमबार मध्यान्ह पुनः नयाँ सुरक्षा खतराको चेतावनी दिइएको हो ।
सुरक्षा स्थिति गम्भीर बनेपछि अड्डामा कार्यरत कर्मचारीहरूलाई विशेष निर्देशन जारी गरिएको छ । उनीहरूलाई अर्को सूचना नभएसम्मका लागि आ-आफ्नो घरभित्रै बस्न र झ्यालहरूबाट टाढा रहन भनिएको छ । सम्भावित जोखिमबाट बच्नका लागि कर्मचारीहरूलाई घरभित्रका मजबुत फर्निचरको मुनि वा पछाडि सुरक्षित रूपमा ओत लागेर बस्न र थप निर्देशनको प्रतीक्षा गर्न सूचित गरिएको छ ।
हाल उक्त क्षेत्रमा सुरक्षा व्यवस्था अत्यन्त कडा पारिएको छ भने अधिकारीहरूले स्थितिलाई नजिकबाट नियालिरहेका छन् ।
