शेरबहादुर परियार (पोल्यान्ड)
नेपाल पत्रकार महासंघ युरोप शाखाद्वारा ३२ औं विश्व प्रेस स्वतन्त्रता दिवसको अवसरमा शुभकामना आदानप्रदान कार्यक्रम सम्पन्न भएको छ ।
नेपाल पत्रकार महासंघ केन्द्रीय सचिव रमेश खतिवडाको प्रमुख आतिथ्यमा जुम अनलाइन प्रविधिमार्फत युरोप शाखाले कार्यक्रम गरेको हो । सचिव खतिवडाले प्रेस स्वतन्त्रता दिवसको शुभकामना दिँदै युरोप शाखाले यस्ता कार्यक्रम नियमित गर्दे आएकोमा खुसी व्यक्त गरे । नेपालका श्रमजीवी पत्रकारहरूका लागि अघिल्लो वर्षको तुलनामा यो वर्ष जोखिमपूर्ण देखिएको भन्दै उनले चिन्ता व्यक्त गरे ।
त्यस्तै केन्द्रीय सचिव शोनी शर्मा र कोषाध्यक्ष रामकृष्ण अधिकारीले हालका दिनमा नेपालमा प्रेस स्वतन्त्रता विविध रूपका चुनौतीहरूसँग जुझिरहेको अवस्थामा महासंघका बैदेशिक शाखाहरूको केन्द्रसँग अझ समन्वयको आवश्यक रहेको बताए ।
अध्यक्ष केजिन राईको अध्यक्षता तथा महासचिव शेरबहादुर परियारले सञ्चालन गरेको कार्यक्रममा युरोप शाखाका पत्रकारहरुको उपस्थित रहेको थियो ।
नेपाल पत्रकार महासंघ युरोप शाखाका संरक्षक पञ्चम अधिकारी समेत बेल्जियमबाट कार्यक्रममा उपस्थित भएका थिए । कार्यक्रममा उपाध्यक्ष राजकुमार थापाले स्वागत मन्तव्य राखेका थिए ।
विश्व प्रेस स्वतन्त्रता दिवस हिजो विश्व भर विभिन्न कार्यक्रम गरी मनाइँदैछ । युनेस्कोले सन् १९९३ देखि मे ३ लाई विश्व प्रेस स्वतन्त्रता दिवसका रुपमा मनाउने प्रस्ताव गरे अनुसार हिजोको दिनलाई स्मरणसहित दिवसको रुपमा मनाउन थालिएको हो ।
युनेस्कोले यस वर्षका लागि ‘एआई (कृत्रिम बौद्धिकता) लाई सामाजिक एजेण्डाका रुपमा राख्ने समय’ भन्ने नारा तय गरेको छ ।