पोर्चुगल — युरोपमा सामान्यतया फेब्रुअरी महिना चिसो र हिउँको समय मानिए पनि यस वर्ष भने प्रकृतिमा केही भिन्न दृश्यहरू देखिन थालेका छन् । पछिल्ला केही दिनयता तापक्रममा आएको क्रमिक वृद्धिसँगै मानिसहरूले गर्मीको पदचाप महसुस गर्न थालेका छन् । विशेष गरी सहरका मुख्य सडक, पार्क र सार्वजनिक स्थलहरूमा हिउँदका मोटा कोट र ज्याकेटहरूलाई छाडेर मानिसहरू छोटो र हलुका लुगामा सजिएर निस्कन थालेपछि युरोपेली जनजीवनमा प्रि-समर (गर्मी पूर्व) को रौनक छाएको आभास हुन्छ ।
मौसममा देखिएको यो परिवर्तनको सिधा प्रभाव यतिबेला यहाँका सुपरमार्केट र सपिङ महलहरूमा प्रस्टै देख्न सकिन्छ । जाडोका लुगाहरू झुन्ड्याइएका र्याकहरू विस्तारै खाली हुँदै गएका छन् भने त्यसको ठाउँमा रङ्गीचङ्गी गर्मीका पहिरन, टिसर्ट र चश्माहरूले बजार ओगट्न थालेका छन् । नयाँ फेसन र हल्का लुगाका पारखीहरूको भीडले गर्दा किनमेल गर्नेहरूको सङ्ख्यामा उल्लेख्य वृद्धि भएको छ । मानिसहरू आगामी गर्मी सिजनका लागि अहिले नै तयारी अवस्थामा रहन इच्छुक देखिएका छन्, जसका कारण व्यापारिक केन्द्रहरूमा निकै चहलपहल बढेको छ ।
त्यसैगरी, घामको न्यानोपनसँगै पार्क र खुला क्षेत्रहरूमा मानिसहरूको उपस्थिति बाक्लिएको छ। लामो समयको कठ्याङ्ग्रिदो जाडो पछि खुला आकाशमुनि रमाइलो गर्ने र घाम ताप्नेहरूको सङ्ख्याले युरोपका पार्कहरू फेरि जीवन्त बनेका छन् । बाटोमा हिँड्ने पैदलयात्रीहरूको पहिरन शैली र बजारको बदलिँदो स्वरूपले युरोपमा यस पटक गर्मी अलि चाँडै नै सुरु हुन लागेको सङ्केत गरेको छ । यद्यपि, यो मौसमी फेरबदलले एकातिर उत्साह जगाएको छ भने अर्कोतिर जलवायु परिवर्तनका कारण समयभन्दा अगाडि नै बढ्दै गएको तापक्रमप्रति सचेत नागरिकहरूमा चासो र चिन्ता पनि थपिदिएको छ ।
