पोर्चुगल (लिस्बन) — पोर्चुगलको मौसम तथा समुद्र विज्ञान संस्थान (IPMA) ले आज मंगलबार, ३ फेब्रुअरी २०२६ का लागि देशका विभिन्न भागहरूमा गम्भीर मौसमी चेतावनी जारी गरेको छ । आज दिउँसो र साँझदेखि मौसममा उल्लेखनीय गिरावट आउने पूर्वानुमान गरिएको छ, जसले गर्दा जनजीवन प्रभावित हुन सक्ने देखिन्छ ।
विशेषगरी देशको दक्षिणी र तटीय क्षेत्रहरूमा मौसमको प्रभाव बढी देखिनेछ । फारो, बेजा र सेतुबल जिल्लाहरूमा आज साँझ १८:०० बजेदेखि लागू हुने गरी पहेँलो तहको वर्षाको चेतावनी जारी गरिएको छ । यी क्षेत्रहरूमा कहिलेकाहीं भारी र निरन्तर वर्षा हुने सम्भावना रहेकाले बाढी र डुबानको जोखिम बढ्न सक्ने अनुमान गरिएको छ । वर्षासँगै हावाको गति पनि तीव्र हुनेछ। लेरिया, लिस्बन, फारो, बेजा र सेतुबल जिल्लाहरूमा साँझ ६ बजेदेखि नै पहेँलो तहको हावाको चेतावनी सक्रिय हुनेछ । तटीय क्षेत्रहरूमा ७० देखि ८० किलोमिटर प्रति घण्टा र पहाडी भेगमा ९५ किलोमिटर प्रति घण्टासम्मको वेगमा शक्तिशाली हावाहुरी चल्ने पूर्वानुमान गरिएको छ ।
समुद्री तटीय क्षेत्रको अवस्था अत्यन्त जोखिमपूर्ण रहने बताइएको छ । IPMA ले सबै १० तटीय जिल्लाहरूमा मध्यरातसम्म र कम्तिमा भोलि ४ फेब्रुअरीसम्मका लागि सुन्तला तथा पहेँलो स्तरको समुद्री चेतावनी जारी गरेको छ । पश्चिम तटीय क्षेत्रमा ५ देखि ६ मिटर उचाइका उत्तरपश्चिमी छालहरू आउने र ती छालहरू अधिकतम ११ मिटर उचाइसम्म पुग्न सक्ने खतरा औंल्याइएको छ ।
दक्षिण तटमा पनि २ देखि ३ मिटरका छालहरू उठ्नेछन् । पहाडी जिल्लाहरूमा हिमपातको गम्भीर सम्भावना रहेको छ । गुआर्डा र कास्टेलो ब्रान्को लगायतका ७ जिल्लाहरूका लागि सुन्तला स्तरको र अन्य ३ जिल्लाका लागि पहेँलो स्तरको हिउँको चेतावनी जारी गरिएको छ । विशेष गरी सेरा दा एस्ट्रेला पर्वत शृङ्खलाका उच्च स्थानहरूमा भारी हिमपातको अपेक्षा गरिएको छ । ८०० देखि १००० मिटरभन्दा माथिका क्षेत्रमा हिउँ पर्ने र १२०० मिटरभन्दा माथि १५ सेन्टिमिटरभन्दा बढी हिउँ जम्मा हुन सक्ने सम्भावना छ ।
यसले गर्दा सडकहरू अवरुद्ध हुने, यातायात बन्द हुने, र संरचना वा रूखहरूमा क्षति पुग्ने जोखिम रहेको छ । स्थानीय आपूर्तिमा समेत अवरोध आउन सक्ने भएकाले सतर्क रहन आग्रह गरिएको छ ।
क्षेत्रगत पूर्वानुमानलाई हेर्दा, उत्तर र मध्य क्षेत्रमा तटीय भागमा बारम्बार तीव्र वर्षा हुनेछ, जसमा असिना र मेघगर्जन पनि समावेश हुन सक्छ । दिउँसो अबेरदेखि वर्षाको मात्रा बढ्नेछ र अधिकतम तापक्रममा, विशेष गरी भित्री भागमा, गिरावट आउनेछ। दक्षिणी क्षेत्रमा पनि बिहानैदेखि वर्षा सुरु भई दिउँसोदेखि हावाको गति बढ्ने र मौसम थप प्रतिकूल बन्नेछ ।
प्रमुख शहरहरू लिस्बन र पोर्टोमा पनि मौसम धुम्म रहनेछ । लिस्बन महानगरमा बिहान असिना र मेघगर्जनसहितको वर्षा हुन सक्ने र दिउँसोपछि यो भारी वर्षामा परिणत हुने सम्भावना छ । साँझपख हावाको गति बढेर ७० देखि ८० किलोमिटर प्रति घण्टासम्म पुग्न सक्छ । उता बृहत्तर पोर्टोमा पनि दिनको अन्त्यसम्म भारी वर्षा र तटीय क्षेत्रमा शक्तिशाली हावाहुरीको सामना गर्नुपर्नेछ ।
नागरिक सुरक्षा प्राधिकरण (ANEPC) ले मौसमको यो प्रतिकूल अवस्थालाई मध्यनजर गर्दै सर्वसाधारणलाई विशेष सावधानी अपनाउन र अनावश्यक यात्रा नगर्न सुझाव दिएको छ । चेतावनीहरू कुनै पनि समयमा परिवर्तन हुन सक्ने भएकाले IPMA को आधिकारिक वेबसाइटमार्फत नियमित अपडेट रहन अनुरोध गरिएको छ ।
