पोर्चुगल — पोर्चुगलका विमानस्थलहरूमा, विशेष गरी राहदानी जाँचमा यात्रुहरूले भोग्नुपरेको लामो लाइन र ढिलाइको समस्या समाधान गर्न सरकारले महत्त्वपूर्ण कदम चालेको छ ।
पोर्चुगलको सार्वजनिक सुरक्षा प्रहरी (PSP) ले युरोपेली सीमा तथा तटरक्षक एजेन्सी सँग मिलेर काम गर्ने सम्झौता गरेको छ । यस अन्तर्गत सन् २०२६ को सुरुदेखि पोर्चुगलका मुख्य विमानस्थलहरूमा लगभग ५० जना फ्रन्टेक्सका कर्मचारीहरू थपिनेछन् ।
यो योजना जनवरी २०२६ देखि सुरु हुनेछ । सुरुमा केही अधिकारीहरू आउनेछन् भने मार्च २०२६ सम्ममा सबै ४८ देखि ५० जना अधिकारीहरूले काम सुरु गरिसक्नेछन् । यो सम्झौता हालका लागि एक वर्षको हुनेछ, तर आवश्यकता अनुसार समय थप्न सकिनेछ ।
फ्रन्टेक्सका अधिकारीहरूलाई आवश्यकता अनुसार विभिन्न विमानस्थलमा बाँडिनेछ ।
लिस्बन विमानस्थल : २६ जना (जसमध्ये २३ जनाले सिधै सीमा रक्षकको काम गर्नेछन्) ।
पोर्टो विमानस्थल : १२ जना (८ जना सीमा रक्षक) ।
फारो विमानस्थल : १० जना (६ जना सीमा रक्षक) ।
पछिल्ला महिनाहरूमा, विशेष गरी लिस्बन विमानस्थलमा राहदानी जाँचका क्रममा अत्यधिक ढिलाइ भएको गुनासो बढेको थियो । अझ गत अक्टोबरदेखि ‘गैर-युरोपेली युनियन’ नागरिकहरूका लागि नयाँ जाँच प्रणाली लागू भएपछि लाइन झन् लामो हुन थालेको थियो । यही समस्यालाई कम गर्न सरकारले ‘कार्यदल’ बनाएर यो समाधान निकालेको हो ।
यो सहकार्य अन्तर्गत फ्रन्टेक्सले पोर्चुगिज प्रहरीलाई तालिम पनि दिइरहेको छ । करिब १ सय जना पोर्चुगिज प्रहरीले हवाई स्कर्टिङको तालिम पाइसकेका छन् । दुई वर्षअघि पोर्चुगलको अध्यागमन विभाग (SEF) खारेज भएपछि विमानस्थलको सुरक्षा जाँचको जिम्मा PSP (प्रहरी) अन्तर्गतको UNEF ले लिएको थियो । हाल UNEF सँग देशभर १ हजार २ सय अधिकारीहरू कार्यरत छन् ।
नयाँ व्यवस्थासँगै सन् २०२६ देखि पोर्चुगल आउने र बाहिरिने यात्रुहरूले विमानस्थलको अध्यागमन वा राहदानी जाँचमा कम समय बिताउनुपर्ने अपेक्षा गरिएको छ ।
