लिस्बन (पोर्चुगल) — पोर्चुगलका लागि नेपाली राजदूत महामहिम प्रकाशमणि पौडेलले पोर्चुगलको परराष्ट्र मन्त्रालयका उच्च अधिकारीसँग महत्त्वपूर्ण शिष्टाचार भेटवार्ता गर्नुभएको छ । दुई देशबीचको कूटनीतिक सम्बन्ध सुदृढ बनाउने उद्देश्यले आयोजित यो भेटघाट डिसेम्बर ०७, २०२६ का दिन लिस्बनस्थित परराष्ट्र मन्त्रालयमा सम्पन्न भएको हो ।
राजदूत पौडेलले पोर्चुगलको परराष्ट्र मन्त्रालयअन्तर्गत एसिया तथा ओसियाना विभाग (Asia and Oceania Department) का निर्देशक मिस्टर भिटर मार्सेलिनो (Mr. Vitor Marcelino) सँग भेट गर्नुभएको थियो । उक्त अवसरमा नेपाल र पोर्चुगलबीच दशकौँदेखि रहिआएको सुमधुर सम्बन्धलाई समयानुकूल परिष्कृत गर्दै लैजाने र आपसी हितका विविध पक्षमा सहकार्य बढाउने विषयमा गहन छलफल भयो । भेटका क्रममा दुवै पक्षले आपसी सहयोग र सहकार्यलाई अभिवृद्धि गर्ने प्रतिबद्धता व्यक्त गरेका छन् ।
विशेष गरी, यस भेटमा दुई देशबीचको ‘द्विपक्षीय परामर्श संयन्त्र’ (Bilateral Consultation Mechanism) को आगामी बैठक आयोजना गर्ने विषयले प्राथमिकता पाएको थियो । उक्त संयन्त्रको बैठकले दुई देशबीचका साझा चासो, व्यापार, पर्यटन र आप्रवासन जस्ता महत्त्वपूर्ण विषयहरूमा थप स्पष्टता र सहकार्यको बाटो खोल्ने अपेक्षा गरिएको छ । यसका अलावा समसामयिक कूटनीतिक विषय र अन्य विविध पक्षहरूमा पनि सौहार्दपूर्ण वातावरणमा विचारविमर्श भएको थियो ।
उक्त शिष्टाचार भेटमा नेपाली राजदूतावासका तर्फबाट तृतीय सचिव श्री अनिल रानाको समेत उपस्थिति रहेको थियो । पोर्चुगलमा नेपाली समुदायको उपस्थिति बाक्लिँदै गइरहेको वर्तमान परिप्रेक्ष्यमा, राजदूत स्तरमा भएको यो सक्रियताले दुई देशबीचको सम्बन्धलाई जनस्तरसम्म पुर्याउन र कूटनीतिक सहकार्यलाई थप फलदायी बनाउन महत्त्वपूर्ण भूमिका खेल्ने विश्वास लिइएको छ ।
