माल्टा — माल्टामा १६औं युरोप क्षेत्रीय सम्मेलन चलिरहेको छ । मार्च २८ तारीख देखि सुरु भएको सम्मेलन ३० तारीख सप्पन्न हुँदैछ । उक्त सम्मेलनमा युरोप तथा अन्य क्षेत्रबाट सहभागीहरु आइरहदा स्थानीय नेपाली पत्रकारहरुलाई भने सहभागी गराइएन । यस सम्मेलनमा स्थानीय नेपाली पत्रकारहरूको सहभागिता रोकिएको विषय चर्चाको रूप लिएको छ।
नेपाली समुदायसँग प्रत्यक्ष सरोकार राख्ने उक्त सम्मेलनमा आन्तरिक पारदर्शिता बाहिरिने डरका कारण आयोजकहरूले स्थानीय नेपाली मिडियालाई जानकारी नगराइएको हुन सक्ने जानकारहरु बताउँछन् ।
नेपाली डायस्पोराका महत्वपूर्ण मुद्दाहरू उठान गर्ने उद्देश्यले आयोजना गरिएको यो सम्मेलन गैरआवासीय नेपाली संघ (एनआरएनए) को युरोप क्षेत्रीय समिति अन्तर्गत सम्पन्न हुँदै गर्दा स्थानीय सञ्चारकर्मीहरूका अनुसार सम्मेलनको बारेमा पूर्वसूचना दिइएन, साथै समाचार लेख्नु पत्रकारको धर्म हो भन्दै पत्रकारले समाचार कभर गर्न खोज्दा समेत आनाकानी गरिएको स्थानीय पत्रकारहरु बताउछन् ।
माल्टामा कार्यरत एक नेपाली पत्रकारका अनुसार, “हामीले सम्मेलनको आधिकारिक जानकारी माग्दा आयोजकहरू अस्पष्ट जवाफ दिँदै टार्न खोजे। युरोपभरिका नेपालीहरूको आवाज उठ्ने मञ्चमा पारदर्शिता कायम गर्नुपर्छ, तर यहाँ त्यसको अभाव देखियो।
माल्टामा भएको उक्त सम्मेलनमा विभिन्न चलखेल भएको समेत आशंका उब्जिएको अनुमान लगाउन सकिन्छ । सम्मेलनमा भएका आन्तरिक छलफलहरू बाहिर आउने डरले मिडियालाई टाढा राखिएको हुन सक्ने माल्टामा रहेका स्थानीय संघसंगठनहरुको ठम्याइ रहेको छ। पत्रकारहरूलाई सहभागी नगराउनु भनेको प्रेस स्वतन्त्रतामाथि खतरा भएको उनीहरूको भनाइ छ।
१६ औं युरोप क्षेत्रीय सम्मेलनका आयोजकहरूले भने मिडियालाई जानकारी नगराउने नियत नभएको दाबी गरेका छन्। एक आयोजकका अनुसार, राष्ट्रिय तथा स्थानीय सबै मिडियालाई जानकारी गराउदै गर्दा कसरी स्थानीय रूपमा कलम चलाउने पत्रकारहरुलाई जानकारी गराइएन । यस बिषयमा छलफल गर्ने बताए। यो नियोजित निर्णय होइन होला तर, यस स्पष्टीकरणले पत्रकारहरूलाई सन्तुष्ट पार्न सकेको छैन।
नेपाली पत्रकारहरूको सहभागिता नहुनु र कार्यक्रमबारे विस्तृत विवरण सार्वजनिक नगरिनु गैरआवासीय नेपाली समुदायभित्रकै पारदर्शिता अभावको संकेत भएको धेरैको मत छ। अब पत्रकार र आम माल्टामा रहेका विभिन्न नेपाली संघसंगठन र समुदायहरुले पारदर्शी सूचना प्रवाहको माग गर्दै दबाब दिनुपर्ने देखिन्छ।