लिस्बन, पोर्चुगल — नेपाली महिलाहरूको महान् पर्व हरितालिका तीजको अवसर पारेर पोर्चुगलको राजधानी लिस्बनमा एक विशेष सांस्कृतिक कार्यक्रम आयोजना हुने भएको छ । चितवन समाज पोर्चुगलको आयोजनामा हुन लागेको उक्त तीज विशेष कार्यक्रममा चर्चित लोक तथा दोहोरी गायक रविन लामिछानेको मुख्य प्रस्तुति रहनेछ ।
आगामी अगस्ट १८ तारिख, सोमबारका दिन लिस्बनस्थित जिनासियो क्लव हलमा आयोजना हुने यस कार्यक्रममा गायक लामिछानेलाई पोर्चुगलमा रहेर नेपाली संगीत क्षेत्रमा सक्रिय स्थानीय कलाकारहरूले पनि साथ दिनेछन् । कार्यक्रम अगस्ट १८ तारिख दिनको ३ बजेदेखि राति ११ बजेसम्म सञ्चालन हुने आयोजकले जनाएको छ । आयोजकका अनुसार, कार्यक्रममा चर्चित गायिका गीता रेउले र कलाकार कला पंगिनीले पनि आफ्नो विशेष प्रस्तुति दिनेछन्, जसले कार्यक्रमलाई थप आकर्षक बनाउने विश्वास लिइएको छ ।
चितवन समाज पोर्चुगलले प्रवासमा रहेका सम्पूर्ण चितवनवासी तथा अन्य नेपाली दाजुभाइ तथा दिदीबहिनीहरूलाई एकै ठाउँमा जमघट गराई तीजको शुभकामना आदानप्रदान गर्ने र सांस्कृतिक मनोरञ्जन प्रदान गर्ने उद्देश्यले यो कार्यक्रम आयोजना गरेको हो ।
समाजले पोर्चुगलमा रहेका नेपाली समुदायबीच आपसी भाइचारा, एकता र सांस्कृतिक सम्बन्धलाई अझ प्रगाढ बनाउन यस्ता कार्यक्रमहरूले महत्त्वपूर्ण भूमिका खेल्ने बताएको छ ।
कार्यक्रमको सबैभन्दा उल्लेखनीय पक्ष यसमा सहभागी हुन कुनै पनि शुल्क नलाग्नु हो । आयोजकले सम्पूर्ण नेपालीहरूलाई कार्यक्रममा निःशुल्क प्रवेशको व्यवस्था गरेको छ ताकि सबैले कुनै आर्थिक भार बिना तीजको उल्लासमा सामेल हुन सकून् ।
आयोजक चितवन समाज पोर्चुगलले एक सूचना जारी गर्दै भनेको छ, “सम्पूर्ण पोर्चुगलवासी नेपाली दिदीबहिनी तथा दाजुभाइहरूमा तीजको शुभकामना व्यक्त गर्दै यस विशेष सांस्कृतिक संध्यामा उपस्थित भई कार्यक्रमको शोभा बढाइदिनुहुन हार्दिक निमन्त्रणा गर्दछौं।”
कार्यक्रमबारे थप जानकारी आवश्यक परेमा चितवन समाज पोर्चुगलका पदाधिकारीहरूलाई सिधै सम्पर्क गर्न सकिने पनि समाजले जनाएको छ । राष्ट्रिय स्तरका कलाकार र स्थानीय प्रतिभाहरूको संगम रहने यो कार्यक्रमले पोर्चुगलको नेपाली समुदायमाझ तीजको विशेष रौनक थप्ने अपेक्षा गरिएको छ ।
