पोर्चुगल — लिस्बन विमानस्थलमा ग्राउन्ड ह्यान्डलिङ सेवा प्रदान गर्ने कम्पनी मेन्जिजका कर्मचारीहरूले गरेको हडतालका कारण शनिबार, अगस्ट ९, बिहान १० बजेसम्म १४ वटा उडान रद्द भएका छन् । शनिबार बिहान सुरु भएको यो हडताल सोमबारसम्म जारी रहने तालिका रहेको छ, जसका कारण थप उडानहरू प्रभावित हुने देखिएको छ ।
पोर्चुगलको राष्ट्रिय समाचार एजेन्सी ‘लुसा’ ले (पोर्चुगल विमानस्थल प्राधिकरण) को वेबसाइट उद्धृत गर्दै जनाएअनुसार, रद्द भएका उडानहरूमा आगमन र प्रस्थान दुवै सामेल छन् । बिहान १० बजेसम्ममा १४ वटा उडान रद्द भइसकेका थिए र दिउँसोका लागि निर्धारित केही उडानहरू पनि पहिले नै रद्दको सूचीमा राखिएको थियो ।
मेन्जिज एभिएसनका ग्राउन्ड ह्यान्डलिङ कर्मचारीहरूले विभिन्न माग राख्दै हडताल घोषणा गरेका हुन् । यो हडतालले विमानहरूको ग्राउन्ड सर्भिस, लगेज ह्यान्डलिङ र अन्य आवश्यक कार्यहरूमा प्रत्यक्ष असर पारेको छ, जसका कारण विमान कम्पनीहरू उडान रद्द गर्न बाध्य भएका छन् ।
सप्ताहान्तमा यात्रा गर्ने योजना बनाएका हजारौँ यात्रुहरू यस हडतालबाट प्रभावित भएका छन् । विमानस्थलले यात्रुहरूलाई आफ्नो उडानको स्थितिबारे जानकारी लिन सम्बन्धित एयरलाइन्ससँग सम्पर्कमा रहन अनुरोध गरेको छ । हडताल सोमबारसम्म जारी रहने भएकाले आगामी दिनहरूमा पनि उडान तालिकामा थप फेरबदल र रद्द हुनसक्ने सम्भावना छ ।
