पोर्चुगल — शुक्रबार पोर्चुगलको अल्गार्वे क्षेत्रको भिला दो बिस्पोको किनारमा काठको डुङ्गामा आएका ३८ जना आप्रवासीहरूलाई शनिबार अदालतमा उपस्थित गराइएको थियो । अदालतले उनीहरूलाई अस्थायी आप्रवासी केन्द्रमा राख्न र पोर्चुगाली भूमिबाट निष्कासन गर्न आदेश दिएको छ ।
राष्ट्रपति पदका मन्त्री एन्टोनियो लेइटाओ अमारोले पोर्चुगाली अधिकारीहरूको द्रुत कारबाहीको प्रशंसा गर्दै उक्त जानकारी दिनुभएको हो । ओल्हाओमा बोल्दै मन्त्री अमारोले भन्नुभयो, “उनीहरूलाई रोक्ने प्रहरीदेखि लिएर, निगरानी गर्ने, पानी र आवश्यक चिकित्सा सहायता प्रदान गर्ने, र सम्मानपूर्वक व्यवहार गर्ने सबै निकायले सराहनीय काम गरेका छन् । अदालतले पनि छिटो फैसला सुनाउँदै राष्ट्रिय भूमिबाट हटाउने आदेश दिएको छ र सोहीअनुसार कारबाही अगाडि बढ्नेछ ।”
प्राप्त जानकारीअनुसार, आप्रवासीहरूको समूहमा महिला र बालबालिका पनि थिए । उनीहरू मोरक्कोबाट आएको बताइएको छ। शुक्रबार साँझ किनारमा आइपुग्दा उनीहरूमध्ये धेरै जना (निर्जलीकरण) र (शरीरको तापक्रम घट्ने) अवस्थामा थिए । तत्कालै उनीहरूलाई स्थानीय प्रहरी, स्वास्थ्यकर्मी र नागरिक सुरक्षा निकायले उद्धार गरी आवश्यक उपचार र हेरचाह प्रदान गरेका थिए ।
शनिबार अदालतमा भएको सुनुवाइपछि वयस्क आप्रवासीहरूलाई देश निकाला गर्ने निर्णय सुनाइएको हो । नावालिगहरूको हकमा भने अन्तर्राष्ट्रिय र पोर्चुगाली कानुन अनुसार विशेष व्यवस्थाअन्तर्गत संरक्षण प्रदान गरिनेछ ।
मन्त्री अमारोले पोर्चुगलको तटीय सुरक्षा निगरानीलाई थप सुदृढ बनाइएको पनि बताउनुभयो । यो घटनाले हालैका वर्षहरूमा उत्तरी अफ्रिकाबाट युरोप प्रवेश गर्न खोज्ने आप्रवासीहरूका लागि पोर्चुगल एक नयाँ गन्तव्य बन्न सक्ने सम्भावनालाई उजागर गरेको छ ।
