लिस्बन, पोर्चुगल — सन् २०२५ को पहिलो ६ महिनामा पोर्चुगलमा पर्यटक आगमनमा उल्लेख्य वृद्धि भएको छ । राष्ट्रिय तथ्याङ्क संस्थान (INE) र टुरिज्मो दे पोर्चुगलले सार्वजनिक गरेको प्रारम्भिक तथ्याङ्क अनुसार देशको पर्यटन क्षेत्रले उत्साहजनक प्रदर्शन गरेको हो ।
सन् २०२५ को पहिलो त्रैमासिक (जनवरी-मार्च) मा ५.७ मिलियन (५७ लाख) पर्यटकले पोर्चुगलको भ्रमण गरेका छन् । यस अवधिमा पर्यटकहरूले १३.४ मिलियन (१ करोड ३४ लाख) रात बिताएका थिए, जसले देशको पर्यटन उद्योगमा बलियो गतिशीलता देखिएको छ ।
कुन देशबाट आए सबैभन्दा धेरै पर्यटक ?
पोर्चुगल भ्रमण गर्ने विदेशी पर्यटकहरुमा युरोपेली देशहरुको वर्चस्व कायमै छ । पहिलो त्रैमासिकको तथ्याङ्क अनुसार, बेलायत, स्पेन, र जर्मनीबाट सबैभन्दा धेरै पर्यटक भित्रिएका छन् । अल्गार्भ र मदेइरा जस्ता पर्यटकीय क्षेत्रमा बेलायती पर्यटकहरुको उपस्थिति बाक्लो देखिएको छ भने स्पेनिस पर्यटकहरुले लिस्बन र पोर्टो जस्ता शहरहरुलाई आफ्नो गन्तव्य बनाएका छन् ।
त्यसैगरी, संयुक्त राज्य अमेरिका र ब्राजिलबाट आउने पर्यटकहरुको संख्यामा पनि निरन्तर वृद्धि देखिएको छ । विशेष गरी, अमेरिकाबाट आउने पर्यटकहरुको संख्यामा भएको वृद्धिले पोर्चुगलको पर्यटन बजार युरोप बाहिर पनि विस्तार भइरहेको संकेत गर्दछ । पोल्याण्ड जस्ता पूर्वी युरोपेली बजारहरूबाट पनि पर्यटक आगमनमा सकारात्मक वृद्धि देखिएको छ ।
पर्यटक संख्यामा भएको वृद्धिसँगै पोर्चुगलको पर्यटन राजस्वमा पनि उल्लेख्य वृद्धि भएको छ । विश्व यात्रा तथा पर्यटन परिषद् (WTTC) ले सन् २०२५ मा पोर्चुगलको पर्यटन क्षेत्रले राष्ट्रिय अर्थतन्त्रमा ६२.७ बिलियन युरो योगदान पुर्याउने प्रक्षेपण गरेको छ, जुन देशको कुल गार्हस्थ्य उत्पादनको २१.५% हो ।
पोर्चुगल सरकार र पर्यटन व्यवसायीहरुले यस वृद्धिलाई दिगो बनाउन विभिन्न पहलहरु अगाडि बढाएका छन् । नयाँ पर्यटकीय गन्तव्यहरुको प्रवर्द्धन गर्ने र पर्यटकीय सिजनलाई वर्षभरि नै फैलाउने जस्ता रणनीतिहरु अपनाइएको छ ।
जुलाई महिनाको अन्त्यसँगै गर्मी मौसमको मुख्य सिजन चलिरहेकोले पर्यटकको संख्या अझै बढ्ने अनुमान गरिएको छ । वर्षको अन्त्यसम्ममा पोर्चुगलले पर्यटक आगमनमा नयाँ कीर्तिमान कायम गर्ने अपेक्षा गरिएको छ । पूर्ण र विस्तृत तथ्याङ्क भने राष्ट्रिय तथ्याङ्क संस्थानले आगामी महिनाहरुमा क्रमशः सार्वजनिक गर्नेछ ।
