पोर्चुगल — आप्रवासन तथा शरणार्थी एकीकरण एजेन्सी (एआईएमए) ले १८ वर्ष मुनिका नाबालिगहरू को आवास अनुमति नवीकरण प्रक्रियालाई थप व्यवस्थित र छिटो बनाउन नयाँ निर्देशन जारी गरेको छ ।
एजेन्सीले अनलाइन पोर्टल मार्फत गरिने नवीकरण आवेदनहरूमा ‘जिम्मेवारी अवधि’ वा ‘जिम्मेवारी पत्र’ पेश गर्न अनिवार्य रहेको जनाएको छ ।
मुख्य अपडेटहरू के के हुन् ?
एआईएमएले स्पष्ट पारेको छ कि जब अभिभावक वा संरक्षकले १८ वर्ष मुनिका बालबालिकाको आवास अनुमति नवीकरणका लागि एआईएमएको आधिकारिक पोर्टल प्रयोग गर्छन्, तब उनीहरूले अन्य कागजातसँगै ‘जिम्मेवारी पत्र’ पनि अपलोड गर्नु पर्नेछ ।
यो किन आवश्यक छ ? यो कागजात मार्फत पोर्चुगलमा बसोबास गरिरहेका अभिभावक वा संरक्षकले सम्बन्धित विदेशी नाबालिग नागरिक (बच्चा) को लागि राष्ट्रिय क्षेत्रमा बसोबास, आवास, र खर्चको पूर्ण जिम्मेवारी लिएको घोषणा गर्दछन् । यो कानुनी रूपमा एक महत्त्वपूर्ण घोषणा हो जसले बच्चाको सुरक्षा र हेरचाहको ग्यारेन्टी गर्दछ ।
कागजात (Modelo 4) कसरी प्राप्त गर्ने ?
– यो जिम्मेवारी पत्रको आधिकारिक मस्यौदा (Draft) एआईएमएको वेबसाइटमा उपलब्ध छ । यसलाई Modelo 4 भनिन्छ ।
— कागजात डाउनलोड गर्ने लिङ्क : यहाँ क्लिक गर्नुहोस् (PDF)
अभिभावकले यो फारम डाउनलोड गरी, आवश्यक विवरण भरेर र हस्ताक्षर गरेर नवीकरण पोर्टलमा अपलोड गर्नुपर्नेछ ।
प्रक्रिया छिटो बनाउन पूर्ण फाइल आवश्यक
एआईएमएले आफ्नो सूचनामा एउटा महत्त्वपूर्ण ‘नोट’ पनि समावेश गरेको छ । यदि निवेदकले सुरुमै ‘जिम्मेवारी पत्र’ सहित सम्पूर्ण आवश्यक कागजातहरू एकैपटक पेश गरेमा : १. आवेदनको निर्णय प्रक्रिया छिटो हुनेछ । २. अनुमति पत्र (Card) जारी हुन लाग्ने समय घट्नेछ । अपूर्ण कागजातहरू पेश गर्दा एजेन्सीले पुनः कागजात माग्नुपर्ने हुन्छ, जसले गर्दा प्रक्रिया लम्बिने र कार्ड आउन ढिलाइ हुने सम्भावना रहन्छ ।
यदि तपाईं आफ्ना छोराछोरीको रेसिडेन्सी नवीकरण गर्दै हुनुहुन्छ भने, कृपया निम्न चरणहरू अपनाउनुहोला :
१. एआईएमएको नवीकरण पोर्टलमा लग-इन गर्नुहोस् ।
२. माथि दिइएको लिङ्कबाट Modelo 4 फारम डाउनलोड गर्नुहोस् ।
३. फारममा अभिभावक र बच्चाको विवरण स्पष्ट भर्नुहोस् र हस्ताक्षर गर्नुहोस् ।
४. नवीकरणका लागि तोकिएका अन्य कागजातहरूसँगै यो फाइल पनि अपलोड गर्नुहोस् ।
उपयोगी लिङ्कहरू :
नवीकरण पोर्टल : AIMA Renewals Portal
जिम्मेवारी फारम (PDF) : Term of Responsibility Draft
यो जानकारी पोर्चुगलमा रहनुभएका सम्पूर्ण नेपाली अभिभावकहरू माझ सेयर गरी उहाँहरूको कानुनी प्रक्रियामा सहयोग पुर्याउन सक्नुहुन्छ ।
