लिस्बन — पोर्चुगलको आप्रवासन, शरणार्थी तथा एकीकरण एजेन्सी (एआईएमए) ले भिसा बिना पोर्चुगल प्रवेश गरेका विदेशी उच्च शिक्षाका विद्यार्थीहरू तथा उच्च योग्यता भएका व्यक्तिहरू, जस्तै शिक्षक र अनुसन्धानकर्ताहरूका लागि आवास अनुमति प्रक्रिया सहज बनाउने उद्देश्यले नयाँ अनलाइन अपोइन्टमेन्ट बुकिङ फारम सञ्चालनमा ल्याएको छ ।
यो नयाँ व्यवस्थाले विशेष गरी कानुनी रूपमा प्रवेश गरेर पनि अपोइन्टमेन्टको पखाईमा रहेका विद्यार्थी र प्राज्ञिक व्यक्तित्वहरूलाई ठूलो राहत दिने अपेक्षा गरिएको छ । अब सम्बन्धित व्यक्तिहरूले आफ्नो प्रक्रिया अगाडि बढाउनका लागि contactenos.aima.gov.pt/contact-form मार्फत सिधै अनलाइन फारम भर्न सक्नेछन् ।
आफ्नो आवेदन प्रक्रियालाई सफलतापूर्वक अगाडि बढाउन र एजेन्सीबाट अपोइन्टमेन्ट प्राप्त गर्नका लागि आवेदकहरूले फारम भर्दा केही महत्त्वपूर्ण कागजातहरू अनिवार्य रूपमा डिजिटल माध्यमबाट पेश गर्नुपर्नेछ । यस अन्तर्गत आवेदकको राहदानीको स्पष्ट स्क्यान गरिएको प्रतिलिपि, सम्बन्धित कलेज वा विश्वविद्यालयमा भर्ना भएको आधिकारिक प्रमाण पत्र, र शिक्षण शुल्क भुक्तानी गरेको रसिद वा प्रमाणको स्क्यान गरिएको प्रतिलिपि समावेश गर्नु अपरिहार्य छ । यी कागजातहरूले आवेदकको विद्यार्थी वा अनुसन्धानकर्ताको हैसियतलाई पुष्टि गर्न मद्दत गर्नेछन् ।
यद्यपि, फारम भर्दैमा अपोइन्टमेन्ट सुनिश्चित भने हुनेछैन । एआईएमएले स्पष्ट पारेको छ कि आवेदकले फारम बुझाइसकेपछि एक कडा प्रमाणीकरण प्रक्रिया अपनाइनेछ ।
एजेन्सीले आवेदकले संकेत गरेको विश्वविद्यालय वा शिक्षण संस्थासँग प्रत्यक्ष सम्पर्क गरी निज भर्ना भए-नभएको, विद्यार्थीले वास्तवमै तोकिएको पाठ्यक्रम वा कक्षाहरूमा नियमित उपस्थिति जनाइरहेका छन् वा छैनन्, र उनीहरूले तिर्नुपर्ने बाँकी शिक्षण शुल्क चुक्ता गरेका छन् वा छैनन् भन्ने कुराको यकिन गर्नेछ । शैक्षिक संस्थाबाट यी सबै विवरणहरूको सकारात्मक पुष्टि प्राप्त भएपछि मात्र एआईएमएले आवेदकलाई अपोइन्टमेन्टको मिति र समय उपलब्ध गराउनेछ ।
यसका साथै, एजेन्सीले अनाधिकृत वा मापदण्ड विपरीतका आवेदनहरूका सन्दर्भमा कडा चेतावनी समेत जारी गरेको छ । यदि भरिएको फारम यस सूचनाको विषय क्षेत्र वा तोकिएको दायराभित्र पर्दैन भने त्यस्ता आवेदनहरूलाई प्रक्रियामा लगिने छैन । साथै, शैक्षिक संस्थाहरूद्वारा विधिवत रूपमा प्रमाणित नभएका वा आवास अनुमति प्राप्त गर्नका लागि आवश्यक कानुनी सर्तहरू पूरा नगर्ने सबै फारमहरूलाई स्वचालित रूपमा बेवास्ता वा रद्द गरिनेछ ।
