पोर्चुगल (लिस्बन) — नेपालमा आगामी फागुन २१ गते हुन गइरहेको प्रतिनिधि सभा निर्वाचनको मिति नजिकिँदै गर्दा त्यसको प्रत्यक्ष प्रभाव सात समुद्र पारि रहेको पोर्चुगलको नेपाली समुदायमा पनि देखिएको छ ।
यतिबेला लिस्बनका चोक, क्याफे र नेपाली जमघट हुने स्थानहरूमा एउटै विषयले चर्चा पाएको छ– देशले अब नयाँ मोड लिन्छ वा पुरानै राजनीतिक चक्र दोहोरिन्छ ? प्रवासमा रहेर पनि देशको माया मुटुमा बोकेका नेपालीहरू कामको व्यस्तताका बीच पनि मातृभूमिको भविष्यप्रति चिन्तित र उत्साहित देखिएका छन् ।
पोर्चुगलमा रहेका नेपालीहरूका अनुसार नेपालका राजनीतिक दलहरूले यस पटक पनि चुनावी बहसलाई केवल उत्तेजक नारा र पुराना योजनाहरूमा मात्र सीमित राखेका छन् । वर्षौंदेखि उही अनुहार र उस्तै आश्वासन सुनेर वाक्क भएका यहाँका नेपालीहरू अबको आवश्यकता भनेको नयाँ सोच र जोस भएको युवा नेतृत्व हो भन्नेमा एकमत देखिन्छन् । उनीहरूको बुझाइमा परम्परागत शैलीले अब देशको विकास सम्भव छैन, त्यसैले नेतृत्व तहमा व्यापक हस्तक्षेप र परिवर्तन अपरिहार्य भइसकेको छ ।
आफू भौतिक रूपमा उपस्थित भई मतदान गर्न नपाए पनि पोर्चुगलबासी नेपालीहरूले प्रविधिको प्रयोग गर्दै नेपालमा रहेका आफ्ना परिवार र आफन्तलाई सचेत गराइरहेका छन् । उनीहरूले भोट माग्न आउने उम्मेदवारसँग ठोस योजना र पारदर्शिताको माग गर्न परिवारलाई सुझाव दिइरहेका छन् ।
यहाँको समुदायको साझा चाहना भनेको अब बन्ने सरकारले सुशासन कायम गरोस्, विकासको गति बढाओस् र विदेशमा रगत–पसिना बगाइरहेका लाखौं नेपालीहरूको मताधिकार सुनिश्चित गर्ने दिशामा ठोस कदम चालोस् भन्ने रहेको छ ।
