पोर्चुगल — लिस्बनस्थित नेपाली राजदूतावासले राहदानीका लागि आवेदन दिएका आवेदकहरुलाई आफ्नो राहदानी बुझिलिनका लागि एक जरुरी सूचना प्रकाशित गरेको छ । “लोट ३” अन्तर्गत राहदानी तयार भएका आवेदकहरुलाई दूतावासले आवश्यक कागजातसहित कार्यालयमा सम्पर्क गर्न अनुरोध गरेको हो ।
दूतावासद्वारा जारी सूचना अनुसार, तोकिएको सूचीमा नाम भएका आवेदकहरुको राहदानी वितरणका लागि तयार भइसकेको छ । राहदानी लिनका लागि आवेदकहरुले आफ्नो सक्कली पुरानो राहदानी र शुल्क बुझाएको रसिद अनिवार्य रुपमा साथमा लिई आउनुपर्नेछ ।
राहदानी वितरणको समय कार्यालय खुलेको दिन दिउँसो २ बजेपछि तोकिएको छ । आवेदकहरुले लिस्बनको Rua Pero de Alenquer 29, 1400-069 मा अवस्थित दूतावासको कार्यालयमा स्वयं उपस्थित भएर आफ्नो राहदानी संकलन गर्न सक्नेछन् ।
स्वयं उपस्थित हुन नसके के गर्ने ?
कुनै कारणवश आवेदक स्वयं उपस्थित हुन नसक्ने अवस्थामा, दूतावासले वैकल्पिक व्यवस्था पनि गरेको छ । त्यस्तो अवस्थामा, आवेदकले आफ्नो तर्फबाट अन्य व्यक्ति (वारिश) पठाउन सक्नेछन् । वारिशमार्फत राहदानी बुझिलिनका लागि आवेदकको सक्कली राहदानी, शुल्क तिरेको रसिद र आवेदकले दिएको मञ्जुरीनामा पत्र अनिवार्य रुपमा पेश गर्नुपर्नेछ ।
दूतावासले राहदानी लिने प्रक्रियालाई छिटो र सहज बनाउन आवेदकहरुलाई एउटा विशेष अनुरोध पनि गरेको छ । राहदानी लिन आउँदा आवेदकले दूतावासको वेबसाइटमा प्रकाशित सूचीमा रहेको आफ्नो नामको क्रम संख्या (S.No.) समेत टिपेर ल्याउन भनिएको छ । उक्त क्रम संख्या त्यहाँ उपस्थित कर्मचारीलाई जानकारी गराउँदा राहदानी खोज्न र वितरण गर्न सहज हुने दूतावासले जनाएको छ ।
राहदानी सम्बन्धी थप जानकारी तथा आफ्नो नाम सूचीमा भए/नभएको यकिन गर्नका लागि आवेदकहरुले नेपाली राजदूतावास, लिस्बनको आधिकारिक वेबसाइट हेर्न सक्नेछन् । दूतावासले समयमै आफ्नो राहदानी बुझेर लैजान सम्बन्धित सबैलाई आग्रह गरेको छ ।
