पोर्चुगल — पोर्चुगलका विश्वप्रसिद्ध र सफल फुटबल प्रशिक्षक जोसे मोरिन्हो आफ्नो पुरानो क्लब एसएल बेन्फिकामा मुख्य प्रशिक्षकको रूपमा फर्किएका छन् । क्लबले बुधवार एक विशेष कार्यक्रम मार्फत मोरिन्होलाई २०२७ को अन्त्यसम्मका लागि क्लबमा अनुबन्ध गरेको आधिकारिक घोषणा गरेको हो ।
‘द स्पेशल वन’ का रूपमा परिचित मोरिन्होको यो पुनरागमनलाई पोर्चुगिज फुटबल र विश्वभरका फुटबल प्रशंसकहरूले निकै उत्साह र चासोका साथ हेरेका छन् । सन् २००० मा बेन्फिकाबाटै आफ्नो शीर्ष-स्तरको कोचिङ करियर सुरु गरेका मोरिन्होको लागि यो एक भावनात्मक ‘घर फिर्ती’ भएका हुन् ।
क्लबको आधिकारिक घोषणा
सम्झौता घोषणा कार्यक्रममा बोल्दै बेन्फिकाका अध्यक्ष रुई कोस्टाले भने, “जोसे मोरिन्हो जस्तो अनुभवी, सफल र विश्वविजेता प्रशिक्षकलाई पुनः क्लबमा स्वागत गर्न पाउँदा हामी अत्यन्तै गौरवान्वित छौं । उनको नेतृत्व, रणनीति र उपाधि जित्ने भोकले क्लबलाई राष्ट्रिय तथा युरोपेली स्तरमा नयाँ उचाइमा पुऱ्याउनेछ भन्नेमा हामी विश्वस्त छौं ।”
मोरिन्होको प्रतिबद्धता
आफ्नो पुनरागमनबारे बोल्दै जोसे मोरिन्होले भने, “बेन्फिका मेरो हृदयको नजिक छ । यहीँबाट मेरो यात्रा सुरु भएको थियो । क्लब र यहाँका समर्थकहरूप्रति मेरो विशेष सम्मान छ । अब मेरो एकमात्र लक्ष्य भनेको कडा मिहिनेत गरेर बेन्फिकालाई उपाधिहरू जिताउनु हो ।”
विगत र वर्तमान
मोरिन्होले यसअघि पोर्टो, चेल्सी, इन्टर मिलान, रियल म्याड्रिड, म्यानचेस्टर युनाइटेड, टोटनह्याम, रोमा र फेनेरबाचे जस्ता विश्वका ठूला क्लबहरूलाई प्रशिक्षण दिइसकेका छन् । उनले आफ्नो करियरमा च्याम्पियन्स लिग, युरोपा लिग, र विभिन्न देशका घरेलु लिगहरू लगायत दर्जनौं प्रतिष्ठित उपाधिहरू जितेका छन् ।
मोरिन्होको आगमनले पोर्चुगिज लिगामा नयाँ प्रतिस्पर्धाको सुरुवात गर्ने अनुमान गरिएको छ । बेन्फिका, पोर्टो र स्पोर्टिङ लिस्बनबीचको उपाधि होड अब झनै रोमाञ्चक हुने निश्चित छ । बेन्फिकाका समर्थकहरूले मोरिन्होको नेतृत्वमा क्लबले फेरि एकपटक युरोपेली फुटबलमा आफ्नो पुरानो साख फर्काउने आशा राखेका छन् ।
