पोर्चुगल — पोर्चुगलस्थित नेपाली राजदूतावास, लिस्बनले दूतावासमा विभिन्न कामका लागि आउने सेवाग्राहीहरूको सुविधा र कार्यसम्पादनमा सहजता ल्याउनका लागि केही महत्वपूर्ण नियमहरू पालना गर्न अनुरोध गरेको छ । दूतावासले जारी गरेको सूचनामा सेवा लिन आउनुअघि गर्नुपर्ने तयारी र पालना गर्नुपर्ने समयतालिकाबारे विस्तृत जानकारी दिइएको छ ।
दूतावासले राहदानी फाराम भर्दा विशेष सावधानी अपनाउन आग्रह गरेको छ ।
अनलाइन फारामको शुद्धता : सेवाग्राहीहरूले राहदानी फाराम अनलाइन भर्दा सबै विवरण ठिक भए नभएको अनिवार्य रूपमा जाँच गर्नुपर्ने र फारामलाई A4 साइजको कागजमा आफैंले प्रिन्ट गरेर ल्याउनुपर्नेछ ।
प्रहरी रिपोर्ट : साथै, प्रहरी रिपोर्ट पनि रङ्गीन कागजमा आफैंले प्रिन्ट गरेर ल्याउनुपर्नेछ ।
सक्कल र फोटोकपी : दूतावासले सबै सक्कल कागजातका फोटोकपी पनि चाहिन सक्ने भएकाले सेवाग्राहीहरूलाई फोटोकपी पनि सँगै लिएर आउन अनुरोध गरेको छ ।
राजस्व (फीस) भुक्तानीका लागि नगद वा बैंक ट्रान्सफरको सुविधा रहेको छ ।
ट्रान्सफरको समस्या : बैंक ट्रान्सफरको माध्यमबाट भुक्तानी गर्दा (तत्काल ट्रान्सफर) नगरेका कारण धेरै समस्या उत्पन्न भएको उल्लेख गर्दै दूतावासले काउन्टरमा सोधेर मात्रै ट्रान्सफर गर्न आग्रह गरेको छ ।
दूतावासले सेवाग्राहीहरूलाई आफू आउने कामसँग सम्बन्धित सम्पूर्ण नियमहरू बुझेर मात्र आउन जोड दिएको छ ।
जानकारीका स्रोत : आवश्यक जानकारी लिनका लागि राहदानी विभाग, कन्सुलर विभाग तथा दूतावासको आधिकारिक वेबसाइट्, दूतावासको फेसबुक पेजका साथै सेवा प्राप्त गरिसकेका अन्य व्यक्तिहरूबाट पनि परामर्श लिन सकिने जनाइएको छ ।
दूतावासले कुनै पनि जिज्ञासा वा सहयोगका लागि निम्न सम्पर्क विवरणहरू प्रयोग गर्न सकिने जनाएको छ ।
ईमेल : eonlisbon@gmail.com
टेलिफोन : 213011308
ठेगाना : Rua Pero de Alenquer 29, 1400-293, Lisboa
नेपाली राजदूतावास, लिस्बनले यी नियमहरूको पालनाले दूतावासको कार्यप्रवाहलाई सुचारु बनाउनुका साथै सेवाग्राहीहरूलाई अनावश्यक झन्झटबाट मुक्त गर्न मद्दत गर्ने विश्वास व्यक्त गरेको छ ।
