पोर्चुगल — लिस्बन महानगरपालिका वरपर बसोबास गर्ने सर्वसाधारणका लागि विद्युत् वितरक कम्पनी ई-रेड्सले एक महत्त्वपूर्ण सूचना जारी गरेको छ । विद्युतीय पूर्वाधारहरूको मर्मत सम्भार, नयाँ जडान तथा प्राविधिक सुधारका कार्यहरू गर्नुपर्ने भएकाले आउँदो आइतबार, अर्थात् जनवरी ४ तारिखका दिन लिस्बन क्षेत्रका विभिन्न स्थानहरूमा विद्युत आपूर्ति अस्थायी रूपमा बन्द हुने भएको छ। यो अवरोध बिहान ५ बजेदेखि ११ बजेसम्म विभिन्न समय तालिका अनुसार रहनेछ ।
कम्पनीले उपलब्ध गराएको जानकारी अनुसार, कास्केस नगरपालिका अन्तर्गतका कास्केस र एस्टोरिल क्षेत्रमा बिहान ५:०० बजेदेखि ११:०० बजेसम्म बिजुली जानेछ । यस समयमा विशेषगरी अलामेडा डुक्वेसा डे पामेला, लुगार प्राया डुक्वेसा, पारेडाओ लेस्टे र पासेयो मारिटिमो लगायतका स्थानहरूमा विद्युत् सेवा उपलब्ध हुने छैन ।
त्यस्तै, लोरेस नगरपालिकाका केही भागहरूमा बिहान ६:०० बजेदेखि ११:०० बजेसम्म विद्युत अवरोध हुने तालिका रहेको छ । यस अन्तर्गत क्यामरेट, अनहोस र एपेलाकाओ क्षेत्रभित्र पर्ने अजिन्हागा दास मोस, अजिन्हागा डोस कुकोस, फोन्टे दा पिपा, फोन्टेनहास, रुआ ३१ डे आउटुब्रो लगायतका विभिन्न भित्री सडक तथा बस्तीहरूमा विद्युत् काटिनेछ । यस क्षेत्रका धेरैजसो मुख्य तथा सहायक मार्गहरूमा मर्मत कार्य चलिरहँदा स्थानीय बासिन्दाहरू प्रभावित हुनेछन् ।
उता ओडिभेलास नगरपालिकाको पोभोआ डे सान्तो एड्रियाओ र ओलिभल बास्तो क्षेत्रमा पनि बिहान ६:०० बजेदेखि ११:०० बजेसम्म नै लाइन काटिनेछ । यसले बाइरो दा कासापिया, क्विन्टा डोस कुकोस, प्रासेटा रोल्डाओ, क्विन्टा रोल्डाओ र यस आसपासका मुख्य सडकहरूमा बस्ने बासिन्दाहरूलाई प्रत्यक्ष असर पुर्याउनेछ ।
ई-रेड्सले आफ्ना ग्राहकहरूलाई पर्ने असुविधाप्रति सचेत रहेको जनाउँदै यी अवरोधहरू पूर्ण रूपमा योजनाबद्ध र नियन्त्रित तवरले गरिने स्पष्ट पारेको छ । कम्पनीका अनुसार, विद्युत आपूर्तिका अन्य सबै वैकल्पिक उपायहरू समाप्त भएपछि मात्र अन्तिम विकल्पका रूपमा लाइन काटिने गरिन्छ, ताकि ग्राहकहरूमा पर्ने प्रभाव सकेसम्म न्यूनतम होस् र मर्मत कार्य छिटो सकियोस् । तसर्थ, प्रभावित क्षेत्रका बासिन्दाहरूलाई सोही अनुसार बिहानको समय व्यवस्थापन गर्न र विद्युतीय उपकरणहरूको सुरक्षामा ध्यान दिन अनुरोध गरिएको छ ।
