पोर्चुगल — पोर्चुगलको आप्रवासन र शरणका लागि एजेन्सी (एआईएमए) ले निवास अनुमति नवीकरण गर्न चाहने आप्रवासीहरूका लागि एउटा महत्त्वपूर्ण सूचना जारी गरेको छ ।
एजेन्सीले नवीकरण प्रक्रियालाई सुचारु रूपमा अघि बढाउनका लागि आवेदकहरूले आफ्नो सामाजिक सुरक्षा पहिचान नम्बर (NISS) एजेन्सीको डाटाबेसमा अनिवार्य रूपमा दर्ता गरेको हुनुपर्ने कुरालाई पुनः स्मरण गराएको हो। यदि तपाईंको NISS एआईएमएको प्रणालीमा छैन भने नवीकरणमा समस्या आउन सक्ने भएकाले समयमै विवरण अद्यावधिक गर्न आग्रह गरिएको छ ।
एआईएमएले यो प्रक्रियालाई पूर्ण रूपमा डिजिटल र सहज बनाएको छ । सेवाग्राहीले आफ्नो NISS नम्बर दर्ता गर्न वा सच्याउनका लागि एआईएमएको आधिकारिक ‘अनलाइन सम्पर्क फारम’ प्रयोग गर्नुपर्नेछ । यो फारम भर्ने प्रक्रिया निकै व्यवस्थित बनाइएको छ ।
निवेदकले फारम खोल्नासाथ ‘विषय प्रकार’ अन्तर्गत देखिने विकल्पहरूमध्ये ‘नवीकरण पोर्टल’ छनौट गर्नुपर्छ । त्यसपछि अर्को चरणमा ‘विषय उपप्रकार’ को सूचीबाट ‘सामाजिक सुरक्षा पहिचान नम्बर (NISS) सच्याउनुहोस् वा घुसाउनुहोस्’ (Correct or Insert NISS) भन्ने विकल्प चयन गर्नुपर्ने हुन्छ ।
यति छनौट गरिसकेपछि प्रणालीले मागे अनुसार आफ्नो दर्ता गर्नुपर्ने सही विवरण उल्लेख गर्नुपर्छ र सोसँग सम्बन्धित आवश्यक कागजातहरू (जस्तै NISS को प्रमाण) त्यहीँ अपलोड गर्नुपर्छ । एआईएमएका अनुसार, अनलाइनमार्फत प्राप्त भएका यस्ता अनुरोधहरूलाई उच्च प्राथमिकतामा राखेर कार्य सम्पादन गरिनेछ ।
निवेदन सफलतापूर्वक दर्ता भएको बढीमा दुई कार्यदिन भित्र एजेन्सीले आफ्नो डाटाबेसमा जानकारी अद्यावधिक गर्नेछ । एकपटक एआईएमएको प्रणालीमा तपाईंको NISS अद्यावधिक भइसकेपछि, तपाईंले ढुक्कसँग नवीकरण पोर्टलमा गएर आफ्नो निवास अनुमति नवीकरणको अनुरोध प्रक्रिया अगाडि बढाउन सक्नुहुनेछ ।
साथै, एआईएमएले ती व्यक्तिहरूलाई पनि स्पष्ट निर्देशन दिएको छ जोसँग हालसम्म सामाजिक सुरक्षा नम्बर (NISS) छैन । यदि कसैसँग NISS छैन भने, उनीहरूले एआईएमएको डाटाबेसमा विवरण भर्नु अगाडि पहिले सामाजिक सुरक्षा कार्यालय वा तोकिएको सरकारी पोर्टल (gov.pt) मार्फत विदेशी नागरिकका लागि निर्धारित प्रक्रिया पूरा गरी NISS प्राप्त गर्नुपर्नेछ ।
NISS नम्बर हात पारिसकेपछि मात्र माथि उल्लेख गरिएको प्रक्रिया अनुसार एआईएमएको सम्पर्क फारममार्फत जानकारी गराउन र नवीकरण प्रक्रियामा सहभागी हुन सकिने एजेन्सीले स्पष्ट पारेको छ ।
