म्याड्रिड, स्पेन — स्पेन र माल्टामा बसोबास गर्दै आएका नेपाली नागरिकहरूका लागि एक महत्त्वपूर्ण तथा खुसीको खबर छ । नेपाली राजदूतावास म्याड्रिडले औपचारिक रूपमा व्यक्तिगत घटना दर्ता (जन्म र मृत्यु दर्ता) को सेवा सुरु गरेको छ ।
यो सेवा सुरु भएसँगै अब स्पेन र माल्टामा रहेका नेपालीहरूले आफ्ना बालबच्चाको जन्म दर्ता वा परिवारका सदस्यको मृत्यु दर्ताका लागि नेपाल नै पुग्नुपर्ने वा अन्य झन्झट व्यहोर्नुपर्ने बाध्यता हटेको छ ।
राजदूतावासका अनुसार, जन्म वा मृत्यु दर्ता प्रमाणपत्र प्राप्त गर्नका लागि सम्बन्धित व्यक्ति स्वयं राजदूतावासमा उपस्थित हुनुपर्नेछ । तर, दूतावास जानुअघि सेवाग्राहीले अनलाइन प्रणालीमार्फत सूचना प्राप्त गरी ‘टोकन नम्बर’ लिएर जानुपर्ने व्यवस्था गरिएको छ ।
व्यक्तिगत घटना दर्ता सम्बन्धी नियमानुसार राजदूतावासले शुल्कको विवरण पनि सार्वजनिक गरेको छ ।
नि:शुल्क सेवा : घटना घटेको (जन्म वा मृत्यु भएको) ३५ दिनभित्र दर्ता गराएमा कुनै पनि शुल्क लाग्ने छैन ।
विलम्ब शुल्क : यदि घटना घटेको ३५ दिन कटिसकेको खण्डमा दर्ता गर्नुपरेमा २५ युरो शुल्क लाग्नेछ ।
संशोधन वा प्रतिलिपि : विवरण सच्याउनुपरेमा (संशोधन) वा प्रमाणपत्रको प्रतिलिपि लिनुपरेमा ३० युरो शुल्क तोकिएको छ ।
सेवाग्राहीले तोकिएको शुल्क बैंक ट्रान्स्फर वा राजदूतावासमै कार्ड मार्फत भुक्तानी गर्न सक्नेछन् ।
राजदूतावासले यसअघि पासपोर्ट (राहदानी) बनाउने प्रयोजनका लागि बालबालिकाहरूलाई जन्म दर्ताको सट्टा ‘अस्थायी नम्बर’ प्रदान गर्ने गरेको थियो । तर, अब औपचारिक रूपमै जन्म दर्ता सेवा सुरु भइसकेको हुनाले उक्त अस्थायी नम्बर दिने व्यवस्था पूर्ण रूपमा बन्द गरिएकोदूतावासले जनाएको छ । तसर्थ, अब राहदानी बनाउनका लागि पनि अनिवार्य रूपमा जन्म दर्ता नै गराउनुपर्नेछ ।
सेवाग्राहीले व्यक्तिगत घटना दर्तासम्बन्धी थप विस्तृत विवरण र प्रक्रियाका लागि राष्ट्रिय परिचयपत्र तथा पञ्जीकरण विभागको वेबसाइट वा राजदूतावासको सम्पर्कमा बुझ्न सक्नेछन् ।
यो व्यवस्थाले स्पेन र माल्टामा रहेका नेपाली समुदायलाई कानुनी कागजात प्रक्रियामा ठूलो राहत पुग्ने विश्वास गरिएको छ ।
