लिस्बन — गैरआवासीय नेपाली संघ (एनआरएनए) को आगामी १२ औं अन्तर्राष्ट्रिय महाधिवेशनको सरगर्मी बढ्दै जाँदा युरोप क्षेत्रमा युवा नेतृत्वका लागि सरगर्मी सुरु भएको छ । यसै सिलसिलामा एनआरएनए पोर्चुगलका पूर्व उपाध्यक्ष एवं सक्रिय अभियन्ता शिवसागर बुढाथोकीले आगामी कार्यकालका लागि युरोप क्षेत्रको युवा संयोजक पदमा आफ्नो औपचारिक उम्मेदवारी घोषणा गर्नुभएको छ ।
आगामी १४–१६ मार्च २०२६ मा काठमाडौँमा आयोजना हुने ‘बृहत एकताको १२ औं महाधिवेशन’ बाट नयाँ नेतृत्व चयन हुने कार्यतालिका सार्वजनिक भएसँगै बुढाथोकीले आफ्ना स्पष्ट योजना र प्रतिबद्धतासहित चुनावी मैदानमा उत्रिने निर्णय गर्नुभएको हो ।
एनआरएनए पोर्चुगलको कार्यसमिति सदस्य र उपाध्यक्ष जस्तो गरिमामय जिम्मेवारी सफलतापूर्वक सम्हालिसक्नुभएका बुढाथोकीसँग संगठन सुदृढीकरण, समन्वय र समुदाय परिचालनमा गहिरो अनुभव रहेको छ । अन्तर्राष्ट्रिय महाधिवेशन तथा युरोप क्षेत्रीय सम्मेलनहरूमा निरन्तर प्रतिनिधिको रूपमा सहभागी हुँदै आउनुभएका उहाँले डायस्पोरामा रहेका नेपाली युवाहरूका समस्या र आवश्यकतालाई नजिकबाट बुझ्नुभएको छ । उहाँले विशेषगरी परदेशमा रहेका युवाहरूको आवाजलाई संस्थागत रूपमा मुखरित गर्न र उनीहरूलाई एनआरएनएको मूल धारमा ल्याउन आफूले उम्मेदवारी दिएको स्पष्ट पार्नुभएको छ ।
बुढाथोकीको उम्मेदवारीसँगै सार्वजनिक गरिएको कार्ययोजनामा युरोपभरिका नेपाली युवाहरूलाई समेट्ने गरी व्यावसायिक, शैक्षिक र सामाजिक कार्यक्रमहरूलाई प्राथमिकता दिइएको छ ।
उहाँले युरोपका विभिन्न देशमा छरिएर रहेका नेपाली युवाहरूबीच एक सशक्त सञ्जाल निर्माण गरी आपसी सहकार्य र अनुभव आदानप्रदान गर्ने लक्ष्य राख्नुभएको छ । विशेषगरी विद्यार्थी र भर्खरै करियर सुरु गरेका युवाहरूका लागि रोजगार, अध्ययन र व्यवसायका क्षेत्रमा करियर मार्गदर्शन, सीप विकास तालिम तथा विभिन्न उपयोगी वेबिनारहरू सञ्चालन गर्ने उहाँको प्रतिबद्धता रहेको छ ।
युवा उद्यमशीलतालाई प्रवर्द्धन गर्न बुढाथोकीले विशेष योजना अघि सार्नुभएको छ। जसमा नयाँ व्यवसाय सुरु गर्न चाहने युवाहरूका लागि कानुनी परामर्श, व्यावसायिक जानकारी र सफल उद्यमीहरूसँगको अन्तक्रिया कार्यक्रमहरू समावेश छन् ।
सामाजिक उत्तरदायित्वको पाटोलाई पनि उहाँले उत्तिकै महत्त्व दिनुभएको छ । युरोपमा विभिन्न समस्यामा परेका नेपाली युवाहरूलाई तत्काल सहयोग र परामर्श उपलब्ध गराउन एक प्रभावकारी संयन्त्र निर्माण गर्ने उहाँको योजना छ । साथै, युवाहरूमा बढ्दो मानसिक स्वास्थ्य समस्याप्रति सचेतना जगाउन, कुलत विरुद्ध अभियान चलाउन र सकारात्मक जीवनशैली प्रवर्द्धन गर्न उहाँले विशेष जोड दिनुभएको छ ।
त्यसैगरी, सामाजिक सेवामा युवाहरूको ऊर्जा परिचालन गर्ने उद्देश्यले रक्तदान, राहत संकलन र प्राकृतिक विपत्तिका समयमा युवाहरूको सक्रिय सहभागिता बढाउने उहाँको संकल्प रहेको छ । खेलकुद र सांस्कृतिक कार्यक्रमका माध्यमबाट अन्तरदेशीय युवा सम्मेलनहरू आयोजना गरी नेपाली पहिचान र सामाजिक सद्भावलाई अझ मजबुत बनाउने उहाँले बताउनुभएको छ । महिला तथा समावेशी सहभागितालाई मूल मन्त्र मान्दै सबै पृष्ठभूमिका युवाहरूलाई समान अवसर सुनिश्चित गर्ने उहाँको प्रतिवद्धता छ ।
एनआरएनएको अन्तर्राष्ट्रिय संरचनामा युवाका मुद्दाहरूलाई नीतिगत तहमै पुर्याउन र निर्णय प्रक्रियामा युवाहरूको प्रभावकारी भूमिका सुनिश्चित गर्न आफू सधैं क्रियाशील रहने उहाँको भनाइ छ । उम्मेदवारी घोषणाको यस घडीमा बुढाथोकीले युरोपभरिका सम्पूर्ण प्रतिनिधिहरू, अग्रज अभियन्ताहरू र शुभेच्छुकहरूमा सहयोग र समर्थनका लागि हार्दिक अपिल गर्नुभएको छ । युवाहरूको आवाज, भावना र अधिकारलाई संस्थागत रूपमा स्थापित गर्दै एक जिम्मेवार, सक्रिय र एकताबद्ध युवा नेतृत्व निर्माण गर्नु नै आफ्नो अन्तिम लक्ष्य रहेको उहाँले दोहोर्याउनुभएको छ ।
