भियना (अस्ट्रिया) — अस्ट्रियाको भियनास्थित नेपाली राजदूतावासले ग्रिसमा रहेका नेपाली नागरिकहरूका लागि राहदानी नवीकरण तथा नयाँ आवेदन संकलन गर्न विशेष टोली खटाउने भएको छ । दूतावासले हालै एक अत्यन्त जरुरी सूचना जारी गर्दै आगामी मार्च १७ देखि २० तारिखसम्म आफ्नो टोली ग्रिस पुगेर सेवा प्रवाह गर्ने जानकारी दिएको हो । राहदानी आवेदनका लागि अनलाइनमार्फत ‘स्लट’ खुला गरिएकोमा दुई दिनभित्रै २ हजार १ सय ६० जना नेपालीहरूले फारम भरेको देखिएकाले ग्रिसमा राहदानी सेवाको ठूलो माग रहेको दूतावासले जनाएको छ ।
यस प्रक्रियालाई व्यवस्थित बनाउन दूतावासले केही अनिवार्य सर्तहरू अघि सारेको छ । राहदानीका लागि आवेदन दिएका सबै सेवाग्राहीहरूले आगामी मार्च ३, २०२६ सम्ममा अनिवार्य रूपमा राहदानी दस्तुर राजदूतावासको बैंक खातामा जम्मा गरिसक्नुपर्नेछ । बैंकमा रकम जम्मा गर्दा सन्दर्भमा आवेदकको पूरा नाम र राहदानी नम्बर स्पष्ट रूपमा उल्लेख गर्नुपर्ने व्यवस्था गरिएको छ। यसो नगर्दा कसले रकम जम्मा गरेको हो भन्ने पहिचान गर्न कठिन हुने र आवेदन प्रक्रियामा ढिलाइ हुन सक्ने दूतावासको भनाइ छ । बैंकले काट्ने कमिसन वा ट्रान्सफर शुल्क भने आवेदक स्वयंले नै बेहोर्नुपर्नेछ ।
राजदूतावासले सेवाग्राहीहरूलाई स्पष्ट पारेको छ कि बैंक खातामा दस्तुर जम्मा भएको यकिन भएपछि मात्र टोली ग्रिस पुगेको बखत बायोमेट्रिक्स लिइने र आवेदन स्वीकृत गरिनेछ । यसका साथै, दूतावासले कुनै पनि बहानामा नगद रकम नबुझाउन सबैमा आग्रह गरेको छ । कतिपय व्यक्तिले नगदमा पनि राजस्व बुझाउन सकिन्छ भन्दै भ्रम फैलाउन सक्ने हुनाले त्यस्ता कुरामा विश्वास नगर्न र आधिकारिक च्यानलमार्फत मात्र कारोबार गर्न सचेत गराइएको छ । राहदानी दस्तुर बाहेक अन्य कुनै पनि अतिरिक्त रकम कसैलाई नतिर्न र यदि कसैले दूतावासको नाममा पैसा मागेमा तत्काल जानकारी गराउन समेत अनुरोध गरिएको छ ।
यस पटकको निर्धारित मितिमा सेवा लिन नसक्ने नेपाली नागरिकहरूका लागि पनि दूतावासले सकारात्मक सन्देश दिएको छ । ग्रिसमा रहेका सबै नेपालीहरूको राहदानी नवीकरण गर्ने उद्देश्यका साथ दूतावासले निकट भविष्यमै पुनः अर्को टोली खटाएर आवश्यक प्रक्रिया पूरा गर्ने प्रतिबद्धता जनाएको छ ।
तसर्थ, यस पटक छुट्नेहरूलाई नआत्तिन र आगामी सूचनाको प्रतीक्षा गर्न दूतावासले आह्वान गरेको छ । अनाधिकृत रूपमा रकम संकलन गर्ने वा ठगी गर्ने कार्यमा संलग्न जोकोहीलाई पनि स्थानीय कानुन अनुसार कारबाहीका लागि ग्रिसका सम्बन्धित निकायमा उजुरी गरिने चेतावनी समेत सूचनामा दिइएको छ ।
