लिस्बन, पोर्चुगल — पोर्चुगल सरकारले आवासीय अनुमति (Residence Permit) नवीकरण प्रक्रियामा महत्त्वपूर्ण परिवर्तन गरेको छ । नयाँ नियम अनुसार, ३० जुन २०२५ पछि आफ्नो आवासीय अनुमति नवीकरण गर्ने सबै विदेशी नागरिकहरूका लागि कर पहिचान नम्बर (Número de Identificação Fiscal – NIF) र सामाजिक सुरक्षा नम्बर (Número de Identificação da Segurança Social – NISS) अनिवार्य गरिएको छ ।
यो कदम पोर्चुगलको प्रशासनिक प्रणालीलाई सुव्यवस्थित गर्ने र सबै आप्रवासीहरूको कर तथा सामाजिक सुरक्षा सम्बन्धी विवरणहरू अद्यावधिक राख्ने उद्देश्यले चालिएको हो ।
के हो NIF र NISS ?
NIF (कर पहिचान नम्बर) : यो पोर्चुगलको कर कार्यालय (Finanças) द्वारा जारी गरिने एक अद्वितीय नौ-अंकीय नम्बर हो । पोर्चुगलमा कुनै पनि आर्थिक गतिविधि, जस्तै बैंक खाता खोल्न, रोजगारी गर्न, घर किन्न वा भाडामा लिन, र सरकारी सेवाहरू प्राप्त गर्न यो नम्बर आवश्यक पर्दछ ।
NISS (सामाजिक सुरक्षा नम्बर) : यो सामाजिक सुरक्षा (Segurança Social) प्रणालीमा दर्ता भएपछि प्राप्त हुने नम्बर हो । यसले कामदारहरूलाई स्वास्थ्य सेवा, बेरोजगारी भत्ता, पेन्सन, र अन्य सामाजिक सुविधाहरूमा पहुँच प्रदान गर्दछ । पोर्चुगलमा कानुनी रूपमा काम गर्नका लागि यो नम्बर अनिवार्य छ ।
नयाँ नियमको प्रभाव !
पोर्चुगलको आप्रवासन तथा एकीकरण एजेन्सी (AIMA) का अनुसार, आवासीय अनुमति नवीकरणका लागि आवेदन दिँदा अब NIF र NISS नम्बर पेश गर्नुपर्नेछ । यदि आवेदकको कर र सामाजिक सुरक्षा सम्बन्धी कुनै बक्यौता वा अनियमितता छ भने, आवासीय अनुमतिको नवीकरण प्रक्रिया प्रभावित हुन सक्नेछ ।
यो नियमले पोर्चुगलमा बसोबास गरिरहेका हजारौं नेपालीहरूलाई पनि प्रत्यक्ष असर पार्नेछ । अहिलेसम्म यी कागजातहरू बिना पनि कतिपय अवस्थामा आवासीय अनुमति नवीकरण हुँदै आएकोमा अब भने त्यो सम्भव हुने छैन । तसर्थ, आफ्नो आवासीय अनुमतिको म्याद सकिनु अगावै NIF र NISS नम्बर लिएर आफ्नो विवरण दुरुस्त राख्न सम्बन्धित सबैलाई आग्रह गरिएको छ ।
NIF र NISS कसरी प्राप्त गर्ने ?
पोर्चुगल सरकारको आधिकारिक वेबसाइटका अनुसार, विदेशी नागरिकहरूले निम्न प्रक्रिया अपनाएर NIF र NISS प्राप्त गर्न सक्छन् :
NIF प्राप्त गर्न !
आवश्यक कागजात : राहदानी (Passport) र पोर्चुगलमा बसोबासको ठेगानाको प्रमाण । यदि पोर्चुगल बाहिर बस्ने हो भने एक जना वित्तीय प्रतिनिधि (Fiscal Representative) आवश्यक पर्दछ ।
प्रक्रिया : नजिकैको फिनान्सको कार्यालयमा अपोइन्टमेन्ट लिएर वा अनलाइन पोर्टल मार्फत आवेदन दिन सकिन्छ ।
NISS प्राप्त गर्न !
आवश्यक कागजात : राहदानी वा अन्य आधिकारिक परिचय पत्र र आवासीय अनुमति पत्र । यदि रोजगारी सुरु गरिसकेको हो भने रोजगारदाताले पनि NISS का लागि आवेदन दिन सक्छ ।
प्रक्रिया : सामाजिक सुरक्षाको आधिकारिक वेबसाइट मार्फत अनलाइन फारम भरेर र आवश्यक कागजातहरू अपलोड गरेर आवेदन दिन सकिन्छ ।
विशेष व्यवस्था र समयसीमा
जुन ३०, २०२५ सम्म म्याद सकिने आवासीय अनुमतिहरूको हकमा सरकारले केही लचकता अपनाउँदै तिनीहरूको वैधता १५ अक्टोबर २०२५ सम्मका लागि स्वतः बढाएको छ । तर, १ जुलाई २०२५ वा त्यसपछि म्याद सकिने अनुमतिहरूका लागि भने AIMA को नयाँ अनलाइन पोर्टल मार्फत समयमै नवीकरण आवेदन दिनुपर्नेछ, जसमा NIF र NISS अनिवार्य हुनेछ ।
पोर्चुगलमा रहेका नेपाली समुदायका अगुवाहरूले पनि यो नयाँ नियमबारे सबैलाई सचेत गराउँदै समयमै आवश्यक कागजातहरू तयार पार्न र आफ्नो कानुनी अवस्थालाई बलियो बनाउन सुझाव दिएका छन् । यसले भविष्यमा आउन सक्ने अनावश्यक झन्झट र कानुनी जटिलताबाट बच्न मद्दत पुग्ने उनीहरूको विश्वास छ ।
