पोर्चुगल — लिस्बनको सडकमा लामो समयदेखि जीवन गुजारिरहेका एक नेपाली नागरिकको गैरआवासीय नेपाली संघ, पोर्चुगलको सक्रिय पहलमा उचित व्यवस्थापनसहित उद्दार गरी आज स्वदेश फिर्ता गरिएको छ ।
झापा जिल्ला निवासी श्री कट्टेल (नाम गोप्य) वैदेशिक रोजगारीको आशमा पोर्चुगल आएका थिए । तर, विभिन्न पारिवारिक र व्यक्तिगत समस्याका कारण उहाँको जीवन असहज बन्दै गयो । कामको अवसर नपाई, सहयोगको अभावमा उहाँ लिस्बन सहरको सडकमा बस्न बाध्य हुनुभएको थियो ।
उहाँको अवस्थाबारे जानकारी पाएलगत्तै गैरआवासीय नेपाली संघ, पोर्चुगलले तात्कालिक रूपमा सम्बन्धित परिवारसँग समन्वय गर्दै उद्धार प्रक्रिया अघि बढाएको हो । संघले उहाँको सम्पूर्ण व्यवस्थापन गर्दै , सुरक्षित आवास, नियमित खानपान, लत्ताकपडा, स्वास्थ्य परीक्षण, मानसिक सल्लाह, कागजात तयार गर्ने काम तथा नेपाल फर्कनका लागि हवाइ टिकटको समेत व्यवस्था गरेको हो ।
यस्तै, गैरआवासीय नेपाली संघ, पोर्चुगलका अध्यक्ष बम बहादुर जि.सी. ले यसबारे प्रतिक्रिया दिँदै भन्नुभयो, “कुनै पनि नेपाली विदेशको भूमिमा बिचल्लीमा पर्नु हाम्रो साझा पीडा हो । यस्तो अवस्थामा तत्काल सहकार्य र संवेदनशीलता जरुरी हुन्छ। यो उद्धार मानवीय सेवाको प्रतीक हो, जसमा हामी सबैको साझा योगदान रह्यो ।”
उक्त उद्धार अभियान सफल बनाउन सहयोग पुर्याउनुहुने स्थानीय नेपाली व्यवसायीहरू, सामाजिक अभियन्ताहरू, सरोकारवाला निकायहरू, र संघका पदाधिकारी तथा सदस्यहरूलाई गैरआवासीय नेपाली संघ, पोर्चुगलले हार्दिक धन्यवाद प्रकट गरेको छ ।
संघले विदेशमा अप्ठ्यारोमा परेका नेपालीहरूलाई आवश्यक सहयोग पुर्याउने कार्यमा निरन्तरता दिने प्रतिबद्धता जनाएको छ ।
