लिस्बन (पोर्चुगल) — लिस्बनस्थित नेपाली राजदूतावासले पोर्चुगलको दक्षिणी अल्गार्भ क्षेत्रमा बसोबास गर्ने नेपाली नागरिकहरूलाई लक्षित गरी फारो सहरमा सञ्चालन गरेको दुईदिने विशेष घुम्ती कन्सुलर सेवा शिविर सफलतापूर्वक सम्पन्न भएको छ । नोभेम्बर १ र २ (शनिबार र आइतबार) मा सञ्चालित यस शिविरमार्फत सयौं नेपालीहरूले दूतावासबाट प्रदान गरिने अत्यावश्यक कन्सुलर सेवाहरू आफ्नै क्षेत्रबाट प्राप्त गरेका छन् ।
राजधानी लिस्बनबाट करिब ३०० किलोमिटर टाढा रहेको अल्गार्भ क्षेत्रमा कृषि तथा पर्यटन लगायतका क्षेत्रमा ठूलो संख्यामा नेपाली नागरिकहरू कार्यरत छन् । उनीहरूलाई राहदानी नवीकरण वा कागजात प्रमाणीकरण जस्ता सामान्य सेवाका लागि पनि लामो दूरी तय गरेर लिस्बन पुग्नुपर्ने बाध्यता रहेको थियो । यही समस्यालाई मध्यनजर गर्दै दूतावासले सप्ताहन्तको समय पारेर यो विशेष घुम्ती शिविर सञ्चालन गरेको हो ।
नेपाली दूतावास लिस्बनका नियोग उपप्रमुख श्री रामबाबु नेपालका अनुसार, शिविर अत्यन्तै सफल र प्रभावकारी रहेको छ । उहाँले दिनुभएको जानकारी अनुसार :
राहदानी (पासपोर्ट) सेवा : १२० भन्दा बढी नेपाली नागरिकहरूले राहदानी नवीकरणका लागि प्रत्यक्ष रूपमा सेवा लिएका छन् । यसमा राहदानीको म्याद सकिएका, हराएका वा बिग्रिएका राहदानीहरूको पुनःनिर्माणका लागि आवेदन लिइएको थियो ।
कागजात प्रमाणीकरण : विभिन्न प्रकारका ६४ वटा महत्त्वपूर्ण कागजातहरू प्रमाणीकरण गरिएको छ । यसअन्तर्गत मुख्यतः प्रहरी चारित्रिक प्रमाणपत्र तथा अन्य पारिवारिक कागजातहरूको प्रमाणीकरण गरिएको थियो ।
सामान्यतया दूतावास बन्द रहने शनिबार र आइतबारका दिनहरूमा समेत सेवा सञ्चालन गर्दा आफ्नो कामबाट बिदा लिन नपर्ने भएकाले सेवाग्राहीहरू थप लाभान्वित भएका थिए ।
दूतावासले यो घुम्ती सेवा शिविरलाई अत्यावश्यक सेवाको रूपमा सञ्चालन गरेको हो । शिविरको सफलतापछि दूतावासले निकट भविष्यमा पनि राजधानीबाट टाढा रहेका अन्य क्षेत्रहरू तथा सामुद्रिक टापुहरूमा बसोबास गर्ने नेपालीहरूलाई लक्षित गर्दै यस्ता घुम्ती सेवाहरू निरन्तर रूपमा सञ्चालन गर्ने योजना रहेको जनाएको छ । यस प्रकारको सेवाले पोर्चुगलका विभिन्न ठाउँमा छरिएर रहेका नेपालीहरूलाई कन्सुलर सेवामा सहज पहुँच पुर्याएको छ ।
