साइप्रस — रोजगारी तथा विभिन्न सिलसिलामा साइप्रसमा रहेका नेपालीहरूको साझा संस्था तमु समाज साइप्रसले नेपालीहरूको महान् पर्व तथा तमु (गुरुङ) समुदायको नयाँ वर्ष ‘तमु ल्होसार’ भव्य रूपमा मनाउने भएको छ ।
“शास्त्र हराए संस्कार हराउँछ, संस्कार हराए संस्कृति हराउँछ, र संस्कृति हराए मानव जातिको अस्तित्व नै हराउँछ” भन्ने मूल नाराका साथ, समाजले प्रवासमा पनि आफ्नो मौलिक पहिचान जोगाउने उद्देश्यले यो कार्यक्रम आयोजना गर्न लागेको हो । कार्यक्रम २०२६ जनवरी ४ तारिख आइतबार साइप्रसको राजधानी निकोसियामा रहेको ‘एन्टोनाकिस म्युजिक हल’ मा हुने भएको हो ।
‘प्ये म्हस्याँ छ्य म्हमु’ तमु जातिको पुर्ख्यौली मान्यता ‘प्ये म्हस्याँ छ्य म्हमु, छ्य म्हस्याँ ल्हु म्हमु, ल्हु म्हस्याँ म्हि म्हमु’ (अर्थात्: शास्त्र हराए संस्कार, संस्कार हराए संस्कृति र संस्कृति हराए मानिसको अस्तित्व नै समाप्त छ ) लाई आत्मसाथ गर्दै, संस्थाले विगतका वर्षहरूमा झैँ यस वर्ष पनि आफ्नो भाषा, धर्म, संस्कार, र भेषभुषाको संरक्षण तथा संवर्द्धन गर्ने जमर्को गरेको छ ।
ल्हो (वर्ग) परिवर्तन : सर्पलाई बिदाइ, घोडालाई स्वागत तमु पात्रो अनुसार यस पटक सप्री-ल्हो (सर्प वर्ग) लाई बिदाइ गर्दै त-ल्हो (घोडा वर्ग) लाई स्वागत गरिँदै छ । पुरानो वर्षको बिदाइ र नयाँ वर्षको आगमनको यो सुखद अवसरमा साइप्रसमा रहेका सम्पूर्ण नेपाली दाजुभाइ तथा दिदीबहिनीहरू बीच शुभकामना आदानप्रदान गर्न यो कार्यक्रम विशेष रहने आयोजकले जनाएको छ ।
कार्यक्रमको विशेष आकर्षण कार्यक्रममा तमु जातिको मौलिक झाँकी, सांस्कृतिक नृत्य, र परम्परागत गीत-संगीतको प्रस्तुति रहने अपेक्षा गरिएको छ । प्रवासको व्यस्त जीवनका बाबजुद पनि आफ्नोपन र चाडपर्वको महत्त्व दर्शाउन तमु समाज साइप्रसले यो गौरवमय कार्यक्रम आयोजना गर्न लागेको हो ।
प्रवासमा रहेर पनि आफ्नो माटो र मुटुसँग जोडिएको यो पर्वले साइप्रसमा रहेका नेपालीहरू बीच भाइचारा र एकताको सन्देश प्रवाह गर्ने विश्वास लिइएको छ ।
