हेलसिंकी — आज डिसेम्बर ६ का दिन, फिनल्याण्डले आफ्नो १०८ औं स्वतन्त्रता दिवस राष्ट्रिय गौरव र उल्लासका साथ मनाइरहेको छ । सन् १९१७ मा इम्पेरियल रुसबाट देशले मुक्ति प्राप्त गरेको ऐतिहासिक दिनको सम्झनामा आज देशभर विविध कार्यक्रमहरूको आयोजना गरिँदैछ ।
यस विशेष अवसरमा आज देशव्यापी रूपमा सार्वजनिक बिदा दिइएको छ । आपतकालीन र अत्यावश्यक सेवाहरू बाहेक सबै सरकारी, अर्ध-सरकारी र निजी कार्यालयहरू बन्द रहनेछन् ।
स्वतन्त्रता दिवसको मुख्य आकर्षणको रूपमा राजधानी हेलसिंकीस्थित राष्ट्रपति दरबारमा साँझ विशेष स्वागत समारोह आयोजना गरिनेछ । राष्ट्रपति अलेक्ज्याण्डर स्टब र प्रथम महिला सुजान इन्स-स्टब । यस समारोहमा युद्धका दिग्गजहरू, समाजका प्रतिष्ठित व्यक्तिहरू र खेलाडीहरू सहित फिनल्याण्डभरबाट करिब १ हजार ७ सय विशिष्ट पाहुनाहरू उपस्थित हुने अपेक्षा गरिएको छ । कुभोलामा राष्ट्रिय परेड: “हामी सँगै फिनल्याण्डको रक्षा गर्छौं”
यस वर्षको राष्ट्रिय स्वतन्त्रता दिवस परेड कुभोला शहरमा आयोजना गरिँदैछ । यस वर्षको परेडको मुख्य विषयवस्तु “हामी सँगै फिनल्याण्डको रक्षा गर्छौं” भन्ने रहेको छ ।
सर्वसाधारणलाई विशेषगरी हेलिकप्टर फ्लाईओभर र परेड सुरु हुनुभन्दा अगावै कार्यक्रम स्थलमा पुग्न सुझाव दिइएको छ । साथै, सुमुलाक्सोमा फिनिश रक्षा बल र अन्य एजेन्सीहरूले आफ्ना उपकरण र गतिविधिहरूको प्रदर्शनी पनि गर्नेछन् ।
राजधानी हेलसिंकीमा पनि दिनभर विभिन्न कार्यक्रम र प्रदर्शनहरू हुने तय भएको छ । प्रहरीका अनुसार स्वतन्त्रता दिवसको सुरक्षा व्यवस्था हेलसिंकी प्रहरी विभागको वर्षकै सबैभन्दा ठूलो अपरेसन हो ।
हेलसिंकीमा धेरै समूहहरूले र्याली तथा प्रदर्शनहरू आयोजना गर्दैछन् । प्रदर्शन र समारोहका कारण हेलसिंकीको ट्राफिक व्यवस्था, सार्वजनिक यातायातका मार्गहरू र पैदल यात्रीहरूको आवागमनमा परिवर्तन गरिएको छ । धेरै फरक प्रहरी एकाइहरू र अधिकारीहरूको सहकार्यमा प्रहरीले दिनभरि सार्वजनिक व्यवस्था कायम राख्न र कार्यक्रमहरूको सहज प्रवाह सुनिश्चित गर्न विशेष सतर्कता अपनाएको छ ।
फिनल्याण्डबासीहरूले मैनबत्ती बालेर र आफ्ना वीर सहिदहरूको सम्झना गर्दै यो दिनलाई राष्ट्रिय एकताको पर्वको रूपमा मनाउने गर्दछन् ।
