पोर्चुगल — पोर्चुगलको आप्रवासन र शरणार्थी मामिला हेर्ने निकाय (एआईएमए) ले पोर्चुगलमा रहेका अन्तर्राष्ट्रिय विद्यार्थीहरूका लागि एउटा महत्त्वपूर्ण जानकारी सार्वजनिक गरेको छ । यो सूचना विशेष गरी ती विद्यार्थीहरूका लागि लक्षित छ जसले पोर्चुगलमा आफ्नो उच्च शिक्षा, व्यावसायिक शिक्षा वा माध्यमिक शिक्षाको कार्यक्रम पूरा गरिसकेका छन् र अब रोजगारी वा अन्य व्यावसायिक गतिविधिहरू गर्नका लागि त्यहीँ बसोबास गर्न चाहन्छन् ।
एआईएमएले स्पष्ट पारेको छ कि अध्ययनको उद्देश्य सकिएपछि विद्यार्थीहरूले आफ्नो निवास अनुमतिको प्रकार अनिवार्य रूपमा परिवर्तन गर्नुपर्नेछ र यसका लागि तोकिएको विशेष प्रक्रिया अपनाउनुपर्नेछ ।
धेरैजसो विद्यार्थीहरूले आफ्नो पुरानो विद्यार्थी कार्ड नै अनलाइन पोर्टल मार्फत नवीकरण गर्ने प्रयास गर्न सक्ने सम्भावनालाई मध्यनजर गर्दै एआईएमएले चेतावनी जारी गरेको छ । राष्ट्रिय क्षेत्रमा बस्नुको कारण र कानुनी आधार अब ‘अध्ययन’ बाट परिवर्तन भई ‘काम’ वा ‘व्यावसायिक गतिविधि’ भएको हुनाले, नवीकरण पोर्टल मार्फत आवेदन दिनु गलत हुनेछ ।
विद्यार्थी भिसा नवीकरण गर्नुको सट्टा, उनीहरूले सुरुमा दिइएको निवास अनुमतिको प्रकार परिवर्तन गर्न अनुरोध गर्नुपर्छ ।
यस प्रक्रियाका लागि विद्यार्थीहरूले एआईएमएको आधिकारिक वेबसाइटमा रहेको ‘कन्ट्याक्ट फर्म’ (सम्पर्क फारम) प्रयोग गर्नुपर्नेछ । आवेदन दिँदा इच्छुक व्यक्तिले विषयमा “Granting of Residence Permit” (निवास अनुमति प्रदान गर्ने) र उप-प्रकार (Subtype) मा “Authorization for exemption from residence visa – Article 122 – Paragraph o) and p)” छनोट गरी फारम भर्नुपर्ने हुन्छ । यो विधिमार्फत मात्र विद्यार्थी भिसालाई वर्क परमिट वा अन्य व्यावसायिक आवास अनुमतिमा परिवर्तन गर्न सकिने कानुनी व्यवस्था गरिएको छ ।
यसका अतिरिक्त, एआईएमएले कानुनी बसोबासको प्रमाणबारे पनि विद्यार्थीहरूलाई आश्वस्त पारेको छ । जबसम्म यो प्रक्रिया टुंगिदैन वा नयाँ कार्ड हात पर्दैन, तबसम्म विद्यार्थी वा अनुसन्धानकर्ताहरूले आफ्नो म्याद सकिएको पुरानो रेसिडेन्सी कार्ड (TR) सुरक्षित राख्नुपर्नेछ । सो म्याद सकिएको कार्डका साथमा एआईएमएलाई गरिएको अनुरोधको रसिद वा अपोइन्टमेन्टको निस्सा साथमा बोक्नुपर्नेछ ।
यी कागजातहरूले पोर्चुगलको राष्ट्रिय क्षेत्रमा उनीहरूको बसाइ नियमित र वैध रहेको प्रमाणित गर्नेछन् । तसर्थ, प्रक्रिया चलिरहँदा आत्तिनुपर्ने अवस्था नरहेको एआईएमएले जानकारी गराएको छ ।
