लिस्बन (पोर्चुगल) — नेपाली राजनीतिमा वैकल्पिक शक्तिको रूपमा उदाउँदै गरेको उज्यालो नेपाल पार्टीले आफ्नो प्रवास संगठनलाई विस्तार गर्ने क्रममा पोर्चुगलमा नयाँ कार्यसमिति चयन गरेको छ । आज आइतबार, १८ जनवरी २०२६ (तदनुसार ४ माघ २०८२) का दिन पोर्चुगलको राजधानी लिस्बनस्थित ‘द रोयल गोर्खा स्न्याक्स एण्ड सिसा बार’ को प्राङ्गणमा आयोजित एक विशेष भेलाले कुमार योन्जनको अध्यक्षतामा २० सदस्यीय ‘प्रवासी उज्यालो नेपाल पार्टी, पोर्चुगल’ को कार्यसमिति सर्वसम्मत रूपमा गठन गरेको हो ।
उज्यालो नेपाल पार्टीका प्रवास संयोजक सुन्दर सिंह योन्जनको प्रमुख आतिथ्यमा सम्पन्न उक्त कार्यक्रममा पोर्चुगलमा रहेका नेपाली समुदायको बाक्लो उपस्थिति रहेको थियो । कार्यक्रमलाई सम्बोधन गर्दै प्रमुख अतिथि योन्जनले प्रवासमा रहेका नेपालीहरूको हकहित संरक्षण गर्दै मातृभूमिको समृद्धिमा प्रवासी नेपालीहरूको भूमिकालाई एकीकृत गर्न पार्टीले विश्वभर संगठन विस्तार गरिरहेको बताउनुभयो । उहाँले नयाँ कार्यसमितिलाई बधाई दिँदै पोर्चुगलमा रहेका नेपालीहरूका समस्या समाधानमा सक्रिय रहन आग्रह समेत गर्नुभयो ।
नवगठित समितिका अध्यक्ष कुमार योन्जनले आफ्नो नेतृत्वमा पार्टीको एजेन्डालाई प्रवासमा स्थापित गर्ने र नेपाली समुदायलाई एकताबद्ध बनाएर लैजाने प्रतिबद्धता व्यक्त गर्नुभयो । पार्टीका महासचिव एवं प्रवक्ता सन्तोष तामाङका अनुसार, यो समितिले पोर्चुगलमा रहेका नेपालीहरूबीच पार्टीको विचार प्रवाह गर्ने र प्रवासबाटै नेपालको विकासमा टेवा पुर्याउने विभिन्न रचनात्मक कार्यहरू सञ्चालन गर्नेछ ।
लिस्बनको मुख्य पर्यटकीय क्षेत्रमा आयोजित यस भेलाले पोर्चुगलको नेपाली राजनीति र सामाजिक क्षेत्रमा नयाँ उत्साह थपेको दाबी प्रवक्ता तामाङले गर्नुभयो । कार्यक्रममा स्थानीय नेपाली व्यवसायी, समाजसेवी तथा पार्टीका शुभचिन्तकहरूको सहभागिता रहेको थियो ।
