ओस्लो, नर्वे — हिन्दूहरूको पवित्र पर्व जनै पूर्णिमा तथा रक्षा बन्धन नर्वेमा विशेष उल्लास र धार्मिक निष्ठाका साथ सम्पन्न भएको छ । नर्वेको राजधानी ओस्लो नजिकै Dr. Dedichens vei 23, 0673 Oslo स्थित हलमा आयोजित एक भव्य कार्यक्रमका बीच नेपाली हिन्दू समुदायले यो पर्व मनाएका हुन् । यसै शुभ अवसरमा नर्वेमा पशुपतिनाथ मन्दिर स्थापनाको शुभमुहूर्त समेत गरिएको थियो, जसले कार्यक्रमलाई थप ऐतिहासिक र महत्वपूर्ण बनाएको छ ।
शनिबार बिहानैदेखि कार्यक्रमस्थलमा हिन्दू धर्मावलम्बीहरूको बाक्लो उपस्थिति रहेको थियो । कार्यक्रमको प्रारम्भ वैदिक मन्त्रोच्चारणसहित रुद्राभिषेक तथा शिवपूजाबाट गरिएको थियो । पण्डितद्वारा विधिपूर्वक पूजा सम्पन्न भएपछि उपस्थित भक्तजनहरूले जनै फेर्ने तथा रक्षा बन्धन बाँध्ने कार्यमा उत्साहपूर्वक सहभागी भए ।
धार्मिक अनुष्ठानसँगै कार्यक्रममा नेपाली सांस्कृतिक पहिचान पनि जीवन्त देखिएको थियो । स्थानीय भजनमण्डलीले सुमधुर नेपाली भजन–कीर्तन प्रस्तुत गर्दा उपस्थित भक्तजनहरू पनि भक्तिभावमा डुबेर गाउन र नाच्न सक्रिय भएका थिए । यसले नर्वेको भूमिमा एक सानो नेपालकै झल्को दिएको थियो ।
कार्यक्रममा सहभागी अधिकांश भक्तजनहरूले नर्वेमा यस प्रकारको बृहत् धार्मिक तथा सांस्कृतिक कार्यक्रम पहिलो पटक आयोजना भएकोमा हर्ष व्यक्त गरे । उनीहरूले पहिलो पटक यस्तो कार्यक्रममा सहभागी हुन पाउँदा गर्व महसुस भएको र यसले आफ्नो धर्म, संस्कृतिसँग जोडिरहन मद्दत पुर्याएको अनुभव सुनाए । ओस्लो तथा यस वरपरका क्षेत्रहरूबाट दिउँसो अबेरसम्म पनि भक्तजनहरूको आउने क्रम जारी रहेको थियो, जसले कार्यक्रमप्रतिको उत्साहलाई दर्शाउँथ्यो ।
आयोजकहरूले यस कार्यक्रमलाई केवल एक पर्वको उत्सव मात्र नभई, नर्वेमा बसोबास गर्ने सम्पूर्ण हिन्दू धर्मावलम्बीहरूलाई एउटै सूत्रमा बाँध्ने एक ऐतिहासिक प्रारम्भको रूपमा लिएका छन् । पशुपतिनाथ मन्दिर स्थापनाको संकल्पले यसलाई थप गरिमामय बनाएको छ । यो कार्यक्रम नर्वेमा हिन्दू धार्मिक–सांस्कृतिक एकताको एक कोसेढुङ्गा साबित भएको सहभागीहरूको विश्वास छ ।
