पोर्चुगल — सात समुद्रपारि रहे पनि आफ्नो मौलिक संस्कृति र परम्परालाई जीवन्त राख्ने नेपालीहरूको संकल्प साँच्चै प्रशंसनीय छ । यही संकल्पलाई मूर्तरूप दिँदै, नेपाली महिलाहरूको महान् पर्व हरितालिका तीजको पावन अवसरमा पोर्चुगलको राजधानी लिस्बन नेपाली कला र संस्कृतिमा झुम्न आतुर छ । चितवन समाज पोर्चुगलको आयोजनामा हुन लागेको एक भव्य तथा निःशुल्क तीज विशेष सांस्कृतिक कार्यक्रमले पोर्चुगलको नेपाली समुदायमाझ उत्साहको लहर ल्याएको छ ।
आगामी अगस्ट १८ तारिख, सोमबारका दिन लिस्बनको मुटुमा अवस्थित जिनासियो क्लव हलमा आयोजना हुने यस कार्यक्रमको तयारी अन्तिम चरणमा पुगेको छ । “हामी परदेशमा रहेका सम्पूर्ण नेपाली दिदीबहिनीहरूलाई घर-आँगनकै तीजको अनुभूति गराउन चाहन्छौं । यसका लागि हाम्रो सम्पूर्ण टिम दिनरात नभनी खटिरहेको छ,” संस्थाका ऊर्जावान अध्यक्ष शिव ओझाले बताउनुभयो । उहाँका अनुसार, कार्यक्रमलाई सभ्य, भव्य र अविस्मरणीय बनाउन कुनै कसर बाँकी राखिने छैन ।
कार्यक्रमको मुख्य आकर्षणको केन्द्रमा रहनेछन् नेपालका चर्चित लोक तथा दोहोरी गायक, प्रत्यक्ष दोहोरीका बादशाह रविन लामिछाने । आफ्ना जीवन्त र मनछुने गीतहरू मार्फत लाखौं नेपालीको मनमा बस्न सफल गायक लामिछानेको उपस्थितिले कार्यक्रममा आगो बाल्ने निश्चित छ ।
उहाँलाई साथ दिन पोर्चुगलमै रहेर नेपाली संगीतमा सक्रिय सुमधुर स्वरकी धनी चर्चित गायिका गीता रेउले र कला पंगिनी लगायत अन्य स्थानीय कलाकारहरूको पनि बेजोड प्रस्तुति रहनेछ । त्यस्तै साथमा स्थानीय गायक सनम विश्वकर्माको पनि प्रस्तुति रहने भएको छ । राष्ट्रिय र स्थानीय कलाकारहरूको यो संगमले कार्यक्रमलाई थप सुनमा सुगन्ध थप्नेछ । कार्यक्रम अगस्ट १८ तारिखका दिन ३ बजेदेखि राति ११ बजेसम्म निरन्तर सञ्चालन हुनेछ, जसले गर्दा सबैले आफ्नो अनुकूल समयमा उपस्थित हुन सक्नेछन् ।
यस कार्यक्रमको सबैभन्दा उल्लेखनीय र प्रशंसनीय पक्ष भनेको निःशुल्क प्रवेश हो । आयोजक चितवन समाज पोर्चुगलले सम्पूर्ण नेपालीहरूलाई कुनै आर्थिक भार बिना तीजको उल्लासमा सामेल हुन सकून् भन्ने उद्देश्यले यो व्यवस्था गरेको हो । “चाडपर्व सबैको साझा हो, खुसी सबैले बाँड्नुपर्छ। त्यसैले हामीले यसलाई नाफामुखी नभई पूर्णतया सामुदायिक र सांस्कृतिक पर्वको रूपमा मनाउन लागेका हौं,” आयोजक समितिका एक सदस्यले बताए ।
यो कार्यक्रम केवल नाचगान र मनोरञ्जनमा मात्र सीमित रहने छैन । यसको मुख्य उद्देश्य परदेशको व्यस्त जीवनमा एक अर्काबाट टाढा रहेका नेपाली दाजुभाइ तथा दिदीबहिनीहरूलाई एउटै छानामुनि भेला गराई तीजको शुभकामना आदानप्रदान गर्नु, आपसी भाइचारा, एकता र सांस्कृतिक सम्बन्धलाई अझ प्रगाढ बनाउनु हो । चितवन समाज पोर्चुगलले प्रवासमा नेपाली पहिचान र संस्कृतिलाई जीवन्त राख्न यस्ता कार्यक्रमहरूले महत्त्वपूर्ण भूमिका खेल्ने विश्वास लिएको छ ।
चितवन समाज पोर्चुगलले एक सूचना जारी गर्दै भनेको छ, “सम्पूर्ण पोर्चुगलवासी नेपाली दिदीबहिनी तथा दाजुभाइहरूमा हरितालिका तीजको अग्रिम शुभकामना व्यक्त गर्दै, यस विशेष सांस्कृतिक संध्यामा सपरिवार, इष्टमित्रसहित उपस्थित भई कार्यक्रमको शोभा बढाइदिनुहुन र तीजको दरमा सहभागी भइदिनुहुन हार्दिक निमन्त्रणा गर्दछौं ।”
यो कार्यक्रमले पोर्चुगलको नेपाली समुदायमाझ तीजको विशेष रौनक थप्ने र सबैका लागि एक अविस्मरणीय सम्झना बन्ने अपेक्षा गरिएको छ ।
आयोजकले सार्वजनिक गरेको निमन्त्रणा पत्र :
