पोर्चुगल (लिस्बन) — पोर्चुगलमा क्रियाशील धादिङवासीहरुको साझा संस्था, धादिङ समाज पोर्चुगलले आफ्नो आगामी अधिवेशनको तयारी प्रारम्भ गरेको छ । गत साता सम्पन्न समाजको कार्यसमिति बैठकले अधिवेशनलाई लक्षित गर्दै नयाँ सदस्यता वितरण तथा पुरानो सदस्यता नवीकरणका लागि अनलाइन प्रणाली सुरु गर्ने महत्वपूर्ण निर्णय गरेको हो ।
समाजले पोर्चुगलमा छरिएर रहेका सम्पूर्ण धादिङवासीलाई संगठित गर्दै उनीहरुको हकहित र सुखदुःखमा सहयोगी बन्ने उद्देश्यले स्थापित भएको हो ।
यही उद्देश्यलाई थप सशक्त बनाउन र संस्थागत सुदृढीकरणका लागि समाजले आगामी अधिवेशनको तयारी थालेको हो । अधिवेशनको पूर्वतयारी स्वरूप, संस्थाको सदस्यतालाई अझ व्यवस्थित र व्यापक बनाउन अनलाइन फारम सञ्चालनमा ल्याइएको समाजले जनाएको छ ।
एक सूचना जारी गर्दै समाजले आफ्ना सम्पूर्ण सदस्य, शुभेच्छुक तथा पोर्चुगलमा बसोबास गर्ने धादिङवासीलाई उक्त अनलाइन फारममार्फत आफ्नो सदस्यता लिन वा नवीकरण गर्न हार्दिक अनुरोध गरेको छ । “समाजको आगामी अधिवेशनमा सहभागी हुन र संस्थाको भविष्य निर्माणमा आफ्नो मताधिकार प्रयोग गर्नका लागि सदस्यता अनिवार्य हुनेछ,” समाजद्वारा जारी सूचनामा भनिएको छ, “तसर्थ, तल उपलब्ध गराइने लिङ्क प्रयोग गरी समयमै आफ्नो सदस्यता सुनिश्चित गर्नुहुन सबैमा आग्रह गर्दछौं ।”
समाजले नयाँ प्रविधिको प्रयोग गर्दै प्रक्रियालाई सहज र सबैको पहुँचयोग्य बनाएकोमा सदस्यहरूले खुशी व्यक्त गरेका छन् । यसले कागजी प्रक्रियाको झन्झट हटाउने र समयको बचत गर्ने विश्वास लिइएको छ ।
यद्यपि, अधिवेशनको मिति भने हालसम्म तय भइनसकेको समाजले स्पष्ट पारेको छ । “सदस्यता वितरण तथा नवीकरणको प्रक्रियालाई केही समय दिएर उपयुक्त मिति तय गरिनेछ,” समाजले जनाएको छ, “आगामी कार्यसमिति बैठकबाट अधिवेशनको मिति, स्थान र अन्य विस्तृत कार्यक्रमबारे निर्णय गरी सार्वजनिक गरिनेछ ।”
धादिङ समाज पोर्चुगलले पोर्चुगलमा रहेका धादिङवासीहरुलाई विभिन्न सामाजिक तथा सांस्कृतिक कार्यक्रममार्फत एकताबद्ध गराउँदै आएको छ । साथै, जिल्लाबाट पोर्चुगलमा आइपर्ने विभिन्न समस्या समाधानका लागि समेत समाजले सक्रिय भूमिका खेल्दै आएको छ । आगामी अधिवेशनले संस्थालाई थप गतिशील र प्रभावकारी बनाउने नयाँ नेतृत्व चयन गर्ने अपेक्षा गरिएको छ ।
