काठमाडौं — नेपाली लोकसंगीतको क्षेत्रमा लामो समयदेखि क्रियाशील गायक तथा सर्जक अमित बाबु रोकायले आफ्नो नयाँ सांगीतिक कोसेली ‘आफ्नै मन धुरुरु’ सार्वजनिक गरेका छन् । नेपाली मौलिक संस्कृति र परम्पराको जगेर्ना गर्ने उद्देश्यले सिर्जना गरिएको यो गीतमा लोपोन्मुख स्थानीय भाकालाई जीवन्त बनाउने प्रयास गरिएको छ ।
गायक रोकायको आफ्नै आधिकारिक युट्युब च्यानल ‘अमित बाबु रोकाया’ मार्फत सार्वजनिक गरिएको गीतमा विशेषगरी मध्य तथा सुदूरपश्चिम नेपालको रुकुम क्षेत्रमा प्रचलित मौलिक ‘सिंगारु’ र ‘पैंसेरु’ भाकाको स्वाद समेटिएको छ । यस्ता गीतहरूले व्यावसायिक बजारमा ठूलो चर्चा नकमाए पनि आफ्नो क्षेत्र, संस्कृति र समुदायमा भने गहिरो महत्व राख्दछन् र श्रोताहरूमाझ अत्यन्तै लोकप्रिय हुने गर्दछन् ।
‘आफ्नै मन धुरुरु’ गीतमा गायक अमित बाबु रोकायको सुमधुर स्वर रहेको छ । गीतका शब्दहरू रोकाय र प्रेमप्रकाश बुढाथोकीले संयुक्त रूपमा रचना गरेका हुन् । स्थानीयपन र मौलिकतालाई गीतको प्रमुख विशेषता मानिएको छ ।
विशेष रूपमा, यो गीतको अडियो रेकर्डिङदेखि भिडियो छायांकनसम्मका सम्पूर्ण कार्य अमेरिकामा सम्पन्न गरिएको हो । प्रवासमा रहेर पनि आफ्नो माटो र संस्कृतिप्रतिको लगावले यो सिर्जना सम्भव भएको निर्माण टिमले जनाएको छ । भिडियोमा अमेरिकामा बसोबास गर्ने रुकुमेली समुदायको बाक्लो उपस्थिति देख्न सकिन्छ, जसले गीतलाई थप जीवन्त र सांस्कृतिक रूपमा धनी बनाएको छ ।
गीतका निर्माता अमित बाबु रोकाय र प्रेमप्रकाश बुढाथोकी हुन् । त्यसैगरी, गीत निर्माणमा रमेश रेउले, विनोद ओली र मानसिंह बुढाथोकीले प्रायोजन गरेर साथ दिएका छन् ।
गायक रोकायले लामो समयदेखि नेपाली लोकसंगीतमा निरन्तर योगदान दिँदै आएका छन् । उनका दर्जनौं गीतहरू लोकप्रिय छन् । विशेषगरी जीवन बोल्ने र प्रेमिल सिर्जनामा खप्पिस मानिने रोकायले यसपटक आफ्नो जन्मभूमिको मौलिक भाकालाई अन्तर्राष्ट्रिय स्तरसम्म पुर्याउने प्रशंसनीय प्रयास गरेका छन् । ‘आफ्नै मन धुरुरु’ ले विदेशमा बसेर पनि आफ्नो संस्कृति संरक्षणमा जुट्न सकिन्छ भन्ने सुन्दर सन्देश दिएको छ ।
