पोर्चुगल — पोर्चुगलको सक्रिय संस्था तमु समाज पोर्चुगलले आफ्नो प्रतिष्ठित वार्षिक खेलकुद प्रतियोगिता ‘तमु कप’ को सातौँ संस्करण आयोजना गर्ने घोषणा गरेको छ । यही आउँदो अगस्ट ३१ तारिखका दिन हुने यस प्रतियोगितामा ओपन र भेट्रान (+३५) गरी दुई विधामा सेभेन ए साइड फुटबल प्रतियोगिता सञ्चालन हुने भएको छ ।
पोर्चुगलको राजधानी लिस्बनस्थित भितोरिया क्लब दे लिस्बोआको खेल मैदानमा आयोजना हुने यस प्रतियोगिताले पोर्चुगलमा रहेका नेपाली खेलप्रेमी तथा खेलाडीहरूलाई एउटै छानामुनि भेला गराउने लक्ष्य राखेको छ । समाजले एक सूचना जारी गर्दै सम्पूर्ण खेलाडी तथा खेलप्रेमी महानुभावहरूलाई कार्यक्रममा उपस्थित भई प्रतियोगिताको शोभा बढाइदिन हार्दिक अनुरोध गरेको छ ।
तमु समाज पोर्चुगलले यस वर्षको प्रतियोगितालाई थप आकर्षक बनाउन तमु समाजले वृहत पुरस्कार राशिको व्यवस्था गरेको छ । त्यस्तै समाजले अब प्रत्येक वर्ष उक्त खेलकुद प्रतियोगितालाई निरन्तरता दिने समेत बताएको छ ।
७ औँ तमु कप २०२५ (ओपन सेभेन ए साइड)
- प्रथम पुरस्कार : ५ हजार १ सय युरो
- द्वितीय पुरस्कार : २ हजार ५ सय युरो
- प्रवेश शुल्क : ५ सय युरो
७औँ तमु कप २०२५ (भेट्रान +३५ सेभेन ए साइड)
- प्रथम पुरस्कार : १ हजार ५ सय युरो
- द्वितीय पुरस्कार : ७ सय ५० युरो
- प्रवेश शुल्क : ३ सय युरो
आयोजकका अनुसार, पोर्चुगलमा नेपाली समुदायबीच हुने फुटबल प्रतियोगिताहरूमध्ये यो सबैभन्दा ठूलो पुरस्कार राशिको प्रतियोगिता हो । यसले खेलाडीहरूमा थप उत्साह र प्रतिस्पर्धाको भावना जगाउने विश्वास लिइएको छ ।
तमु समाज पोर्चुगलले स्थापनाकालदेखि नै पोर्चुगलमा नेपाली भाषा, संस्कृति र समुदायको एकताका लागि विभिन्न कार्यक्रमहरू आयोजना गर्दै आएको छ । ‘तमु कप’ खेलकुदको माध्यमबाट आपसी भाइचारा, सद्भाव र स्वस्थ प्रतिस्पर्धाको सन्देश प्रवाह गर्ने एक महत्त्वपूर्ण मञ्च बनेको समाजका पदाधिकारीहरू बताउँछन् ।
प्रतियोगितामा सहभागी हुन चाहने टिम तथा खेलसम्बन्धी थप जानकारीका लागि इच्छुक महानुभावहरूले निम्न सम्पर्क नम्बरहरूमा सम्पर्क गर्न सक्नुहुनेछ । ९२०१२१६१३, ९१३३६१६१२ र ९२०५४७५९३ नम्बर रहेको छ ।
युरोपेली मुलुक पोर्चुगल लगायत युरोपको विभिन्न देशहरूमा छरिएर रहेका नेपाली फुटबल खेलाडीहरूका लागि आफ्नो प्रतिभा प्रदर्शन गर्ने यो एक सुनौलो अवसर हुनेछ । साथै, यो खेलकुद महोत्सव सम्पूर्ण नेपाली समुदायका लागि एक अविस्मरणीय दिन बन्ने अपेक्षा गरिएको छ ।
हेर्नुहोस् समाजले सार्वजनिक गरेको सूचना :
