काबुल, अफगानिस्तान — पूर्वी अफगानिस्तानको खोस्त र पक्तिका प्रान्तको सीमावर्ती क्षेत्रमा गएको शक्तिशाली भूकम्पले विनाशकारी क्षति पुऱ्याएको छ ।
स्थानीय समयअनुसार मंगलबार राति गएको ६.० म्याग्निच्युडको भूकम्पका कारण मृत्यु हुनेको संख्या १ हजार नाघेको छ भने घाइते हुनेहरूको संख्या १ हजार ५ सय भन्दा बढी रहेको छ । अधिकारीहरूले दुर्गम क्षेत्रहरूमा उद्धार कार्य जारी रहेकाले मृतक तथा घाइतेको संख्या अझै बढ्न सक्ने चेतावनी दिएका छन् ।
अमेरिकी जियोलोजिकल सर्भे (USGS) का अनुसार भूकम्पको केन्द्रबिन्दु खोस्त शहरबाट करिब ४४ किलोमिटर दक्षिणपश्चिममा, १० किलोमिटर गहिराइमा थियो । मध्यरातमा अधिकांश मानिसहरू सुतिरहेको बेला भूकम्प गएकाले मानवीय क्षति बढी भएको हो ।
पक्तिका प्रान्तमा सर्वाधिक क्षति !
भूकम्पको सबैभन्दा ठूलो असर पक्तिका प्रान्तको गयान र बरमल जिल्लामा परेको छ । यी जिल्लाहरूका अधिकांश घरहरू माटो र ढुंगाले बनेका कच्ची संरचना भएकाले सजिलै भत्किएका थिए । सामाजिक सञ्जालमा सार्वजनिक भएका तस्बिर तथा भिडियोहरूमा भत्किएका घरका भग्नावशेष, पुरिएका सवारीसाधन र उद्धारमा खटिएका स्थानीयहरू देख्न सकिन्छ । एक स्थानीय अधिकारीका अनुसार एउटै परिवारका धेरै सदस्यहरू एकैसाथ पुरिएका छन् र कयौं गाउँहरू पूर्ण रूपमा ध्वस्त भएका छन् ।
उद्धार तथा राहत कार्यमा कठिनाइ !
तालिबान सरकारले भूकम्प प्रभावित क्षेत्रमा उद्धार तथा राहतका लागि हेलिकप्टर र स्वास्थ्यकर्मीहरूको टोली पठाएको छ । यद्यपि, दुर्गम पहाडी भू-भाग, अविरल वर्षा र पहिरोका कारण उद्धार कार्यमा गम्भीर चुनौतीहरू देखिएका छन् । सडक सञ्जाल अवरुद्ध हुँदा घाइतेहरूलाई अस्पतालसम्म पुऱ्याउन र राहत सामग्री वितरण गर्न कठिनाइ भइरहेको छ ।
घाइतेहरूको चापले स्थानीय अस्पतालहरू भरिभराउ भएका छन् । तालिबानका एक वरिष्ठ अधिकारी अनस हक्कानीले सरकारको सीमित स्रोतसाधनले यति ठूलो विपत्ति सामना गर्न कठिन भइरहेको बताउँदै अन्तर्राष्ट्रिय समुदाय र सहायता संस्थाहरूलाई तत्काल सहयोगका लागि अपील गरेका छन् ।
अन्तर्राष्ट्रिय प्रतिक्रिया र सहयोगको प्रतिबद्धता !
संयुक्त राष्ट्रसंघ, युरोपेली संघ, पाकिस्तान, भारत लगायत विश्वका विभिन्न देशहरू र अन्तर्राष्ट्रिय गैरसरकारी संस्थाहरूले भूकम्पप्रति दुःख व्यक्त गर्दै सहयोगको प्रतिबद्धता जनाएका छन् । संयुक्त राष्ट्रसंघले प्रभावित क्षेत्रमा स्वास्थ्यकर्मी, औषधि र आवश्यक सामग्री पठाउन सुरु गरिसकेको जनाएको छ ।
विगत दुई दशकयता अफगानिस्तानमा गएको यो सबैभन्दा घातक भूकम्प हो । आर्थिक संकट र मानवीय सहायताको अभावसँग जुधिरहेको अफगानिस्तानलाई यो प्राकृतिक विपत्तिले थप संकटमा धकेलेको छ ।
