पोर्चुगल — पोर्चुगलको एजेन्सी फर इन्टिग्रेसन, माइग्रेसन एण्ड एसाइलम (एआईएमए) ले फेब्रुअरी २०२२ मा युक्रेनमा युद्ध सुरु भएपछि विस्थापित भएका गैर-युक्रेनी नागरिकहरूका लागि अस्थायी सुरक्षा सम्बन्धी निर्णयहरूको पुनर्मूल्याङ्कन गर्ने प्रक्रिया सुरु गरेको छ ।
यस कदमले युक्रेनमा बसोबास गरिरहेका तर युक्रेनी नागरिकता नभएका तेस्रो मुलुकका नागरिकहरूलाई ठूलो राहत मिल्ने अपेक्षा गरिएको छ, जसले युद्धका कारण देश छोड्नु परेको थियो तर अस्थायी सुरक्षा प्राप्त गर्न कठिनाइ भोगिरहेका थिए ।
एआईएमएले जानकारी गराए अनुसार, यसअघि गरिएका निर्णयहरूमा चित्त नबुझेका वा पुनः विचार गर्न चाहने आवेदकहरूका लागि एक विशेष अनलाइन च्यानल खडा गरिएको छ । सम्बन्धित व्यक्तिहरूले एआईएमएद्वारा उपलब्ध गराइएको सम्पर्क फारम भरेर आफ्नो अनुरोध दर्ता गराउन सक्नेछन् । यस प्रक्रियाका लागि तोकिएको आधिकारिक लिङ्क निम्न रहेको छ : https://contactenos.aima.gov.pt/contact-form
एआईएमएले पुनर्मूल्याङ्कनको अनुरोध गर्ने विदेशी नागरिकहरूले आफ्नो दाबी पुष्टि गर्नका लागि अनिवार्य रूपमा निम्न कागजातहरू पेश गर्नुपर्ने जनाएको छ :
१. अस्थायी सुरक्षा प्रक्रिया नम्बरको प्रमाण : तपाईंले पहिले आवेदन दिँदा प्राप्त गरेको अस्थायी सुरक्षा प्रक्रिया नम्बर उल्लेख भएको कागजातको स्क्यान कपी । २. राहदानी : आवेदकको स्पष्ट देखिने राहदानीको स्क्यान गरिएको प्रतिलिपि । ३. पूरक कागजातहरू : तपाईंको मुद्दा विश्लेषण गर्न मद्दत पुग्ने अन्य कुनै पनि आवश्यक वा थप कागजातहरू (जस्तै: युक्रेनमा बसोबासको प्रमाण, काम वा अध्ययनको प्रमाण आदि) ।
युक्रेन–रुस युद्ध सुरु भएपछि धेरै गैर-युक्रेनी नागरिकहरू (जस्तै विद्यार्थी, आप्रवासी कामदारहरू) पोर्चुगल आएका थिए । यद्यपि, कतिपय अवस्थामा उनीहरूको अस्थायी सुरक्षाको आवेदन अस्वीकृत भएको वा अन्योलमा रहेको गुनासोहरू आएका थिए । यो नयाँ सूचनाले त्यस्ता व्यक्तिहरूलाई आफ्नो फाइल पुन: एआईएमए समक्ष पेश गरी कानुनी हैसियत प्राप्त गर्ने अर्को मौका प्रदान गरेको छ ।
